បរទេស៖ ក្រុមសមាជិកព្រឹទ្ធសភា សហរដ្ឋអាមេរិក ចំនួន៧រូប មកពីគណបក្សទាំងពី គឺគណបក្សលទ្ធិប្រជាធិបតេយ្យ និងគណបក្សសាធារណរដ្ឋ តាមសេចក្តីរាយការណ៍ បានជួបជាមួយប្រធានាធិបតីអ៊ុយក្រែន លោក Volodymyr Zelensky នៅក្នុងទីក្រុងគៀវ កាលពីថ្ងៃចន្ទ ក្នុងដំណើរបង្ហាញការគាំទ្រប្រឆាំង នឹងការឈ្លានពានអាចកើត មានណាមួយពីយោធារុស្ស៊ី។
នៅក្នុងសេចក្តីថ្លែងការណ៍មួយ ការិយាល័យប្រធានាធិបតីអ៊ុយក្រែន បាននិយាយប្រាប់ថា គណៈប្រតិភូព្រឹទ្ធសភាសហរដ្ឋអាមេរិកនោះ បានពិភាក្សាអំពីស្ថានភាពសន្តិសុខរបស់ប្រទេសអ៊ុយក្រែន និងវិធានការត្រូវធ្វើឡើង ដើម្បីកាត់បន្ថយភាពតានតឹង ជាមួយប្រទេសរុស្ស៊ី ស្របពេលដែលទីក្រុងមូស្គូ បានប្រមូលផ្តុំកងទ័ពរាប់សែននាក់ នៅតាមព្រំដែនជិតអ៊ុយក្រែន។
លោកប្រធានាធិបតីអ៊ុយក្រែន បាននិយាយប្រាប់គណៈប្រតិភូសហរដ្ឋអាមេរិកនោះយ៉ាងដូច្នេះថា “វាសំខាន់ខ្លាំងណាស់សម្រាប់ប្រទេសអ៊ុយក្រែន និងសម្រាប់ប្រជាជនរបស់យើង ដែលអ្នកនៅជាមួយយើងនាពេលបច្ចុប្បន្ននេះ នេះគឺនិយាយពីការគាំទ្រដ៏រឹងមាំទាំងពីរគណបក្សនៅសហរដ្ឋអាមេរិក ចំពោះប្រទេសរបស់យើង ក៏ដូចជាអធិបតេយ្យភាពនិងបូរណភាពទឹកដី”។
គួរបញ្ជាក់ថា គណៈប្រតិភូសហរដ្ឋអាមេរិកនោះ រួមមានទាំងសមាជិកព្រឹទ្ធសភា លោក Rob Portman លោក Jeanne Shaheen លោក Chris Murphy លោក Kevin Cramer លោក Amy Klobuchar លោក Roger Wicker និងលោក Richard Blumenthal៕
ប្រែសម្រួល៖ប៉ាង កុង
