ចាប់តាំងពីលោក Joe Biden ឡើងកាន់មុខតំណែង ជាប្រធានាធិបតីអាមេរិកអស់ រយៈពេលជាងមួយឆ្នាំកន្លងមកនេះ អត្រាគាំទ្ររបស់លោកបាន ធ្លាក់ចុះឥតឈប់ឈរ ធ្វើឱ្យលោកក្លាយជា “ប្រធានាធិបតីដ៏ទន់ខ្សោយ” មុនកាលកំណត់។ តាមលទ្ធផលនៃការស្ទង់ ប្រជាមតិដែលសកលវិទ្យាល័យ Quinnipiac របស់សហរដ្ឋអាមេរិកបានប្រកាសឱ្យដឹងថា អត្រាគាំទ្ររបស់លោក Joe Biden មានត្រឹមតែ៣៣ភាគរយប៉ុណ្ណោះ ដែលបានបំបែកកំណត់ត្រាទាបបំផុត ពោលគឺធ្វើឱ្យលោកក្លាយជាប្រធានាធិបតីមួយរូបក្នុងចំណោមប្រធានាធិបតី ដែលមិនត្រូវប្រជាជនស្វាគមន៍បំផុត ក្នុងប្រវត្តិសាស្ត្រសហរដ្ឋអាមេរិក ។
លោក Joe Biden បានប្រែមកជា“ទន់ខ្សោយ” គឺមកពីកត្តាច្រើនយ៉ាងលាយឡំគ្នា ហើយក៏បានបង្ហាញពីគុណវិបត្តិទូទៅ មួយចំនួនក្នុងវិស័យនយោបាយ បក្សទាំងពីរនិងអភិបាលកិច្ចក្នុងសង្គម របស់សហរដ្ឋអាមេរិកផងដែរ ។
ប្រឈមមុខនឹងវីរុសបម្លែងថ្មីប្រភេទ Omicron ដែលមានសភាពរាតត្បាតខ្លាំង និងបានវាយទម្លុះរបាំងការពារ នៃវ៉ាក់សាំងកូវីដ១៩ រដ្ឋាភិបាលរបស់លោក Joe Biden មិនបានត្រៀមខ្លួនជាមុននិងទាន់ពេលវេលា ដែលបណ្តាលឱ្យការផ្គត់ផ្គង់ ឧបករណ៍ធ្វើតេស្តវីរុស និងម៉ាសដែលមានគុណភាពខ្ពស់ ជាដើមខ្វះខាតយ៉ាងធ្ងន់ធ្ងរ និងបានចំណាយពេលវេលាអស់ជាច្រើន ។ បច្ចុប្បន្ននេះ ការរីករាលដាលនៃជំងឺកូវីដ១៩ នៅសហរដ្ឋអាមេរិកមានភាព ធ្ងន់ធ្ងរជាងពេលណាៗទាំងអស់ ក្នុងរយៈពេលពីរឆ្នាំកន្លងទៅនេះ ពោលគឺករណីឆ្លងថ្មី ករណីសម្រាកក្នុងមន្ទីរពេទ្យ និងករណីស្លាប់មានចំនួន បន្តកើនឡើងឥតឈប់ឈរ មន្ទីរពេទ្យក្នុងតំបន់ជាច្រើន បានដំណើរការហួសពីសមត្ថភាព។
ចំណែកខាងវិស័យ “ធ្វើឱ្យសហរដ្ឋអាមេរិកសាមគ្គីគ្នា” វិញ លោក Joe Biden ក៏ខ្វះសមត្ថភាពគ្រប់គ្រាន់ដែរ ។ ក្នុងរយៈពេលមួយឆ្នាំកន្លងទៅនេះ បក្សទាំងពីររបស់សហរដ្ឋអាមេរិកកាន់តែបដិបក្ខគ្នា សភាពជាប់គាំងផ្នែកនីតិបញ្ញតិ នៃរដ្ឋសភាក៏កាន់តែពិបាកដោះស្រាយ ការបែកបាក់ក្នុងសង្គមនិងការ មិនជឿទុកចិត្តចំពោះរដ្ឋាភិបាលនិងប្រព័ន្ធសារព័ត៌មានរបស់ ប្រជាជនកាន់តែខ្លាំងឡើងៗ ហើយផ្នែកការទូតនិងសេដ្ឋកិច្ច ក៏ទទួលបរាជ័យដែរ ។
ក្នុងវិស័យសេដ្ឋកិច្ច ពិតមែនតែក្នុងរយៈពេលមួយឆ្នាំ កន្លងមកបន្ទាប់ពីលោក Joe Biden ឡើងកាន់មុខតំណែង ប្រាក់ខែនៅសហរដ្ឋអាមេរិក បានកើនឡើងជាទូទៅ សហគ្រាសថ្មីបានលេចចេញជាច្រើន និងកម្រិតភាពក្រីក្របានធ្លាក់ចុះក៏ដោយ ក៏ប៉ុន្តែភាពបរាជ័យធំទាំងពីរ ពោលគឺ វិបត្តិខ្សែសង្វាក់ផ្គត់ផ្គង់ និងអត្រាអតិផរណាកើនខ្ពស់ជាបន្តបន្ទាប់ សឹងតែធ្វើឱ្យសមិទ្ធផលដែល រដ្ឋាភិបាលរបស់លោក Joe Biden ទទួលបានខាងវិស័យសេដ្ឋកិច្ច និងជីវភាពរស់នៅរបស់ ប្រជាជនត្រូវបានលិចលង់។
ក្នុងវិស័យការទូត លោក Joe Biden ក៏មិនបានបង្កើតរូបភាពជា “មេដឹកនាំខ្លាំងពូកែ”នោះដែរ ។ កាលពីចុងខែសីហាឆ្នាំ២០២១ សហរដ្ឋអាមេរិកបានដកទ័ពចេញពីអាហ្វហ្កានីស្ថានយ៉ាងប្រញាប់ប្រញាល់ អង្គការតាលីបង់កាន់អំណាច ជាតិសារជាថ្មីឡើងវិញ ដំណោះស្រាយដែលដកទ័ពចេញ របស់រដ្ឋាភិបាលរបស់លោក Joe Biden ស្ទើរតែត្រូវគេទទួលស្គាល់ជាទូទៅថា ជាភាពបរាជ័យដ៏ធ្ងន់ធ្ងរ ។ សហរដ្ឋអាមេរិកបញ្ចប់សង្គ្រាម នៅអាហ្វហ្កានីស្ថាន យ៉ាងលំបាកលំបិនបែបនេះ មិនត្រឹមតែបំផ្លាញកិត្តិយសសហរដ្ឋអាមេរិកនិងធ្វើឱ្យសម្ព័ន្ធមិត្ត បាត់បង់ទំនុកចិត្តប៉ុណ្ណោះទេ ថែមទាំងក៏នាំឱ្យសមត្ថភាព ដឹកនាំរបស់លោក Joe Biden រងការសង្ស័យយ៉ាងខ្លាំងផងដែរ ដែលក្លាយជាចំណុចរបត់មួយនៃអត្រាគាំទ្រ ក្នុងការស្ទង់ប្រជាមតិរបស់លោក Joe Biden ។
បើមើលពីរយៈពេលមួយឆ្នាំកន្លងទៅនេះ លោក Joe Biden ជំនួសលោកត្រាំចូលកាន់អំណាចក្នុងសេតវិមាន គឺមិនអាចនាំឱ្យពិភពលោកឃើញ ការលើកកម្ពស់កិត្តិយសរបស់សហរដ្ឋអាមេរិកនោះទេ ។ ឆ្នាំនេះជាឆ្នាំបោះឆ្នោតដំណាក់កាល កណ្តាលរបស់សហរដ្ឋអាមេរិក អ្នកជំនាញបានសម្គាល់ជាទូទៅថា បក្សសាធារណរដ្ឋមានលទ្ធភាពខ្ពស់ណាស់ដែលអាចដណ្តើមយក ឋានៈជាបក្សភាគច្រើនយ៉ាងហោចណាស់ ក្នុងសភាមួយនៃរដ្ឋសភាក្នុងការ បោះឆ្នោតដំណាក់កាលកណ្តាល នេះគឺមានន័យថា លោក Joe Biden នឹងមានឋានៈកាន់តែទន់ខ្សោយ ក្នុងរយៈពេលពាក់កណ្តាល ខាងក្រោយនៃអាណត្តិរបស់ខ្លួន ៕
