បរទេស ៖ ប្រព័ន្ធផ្សព្វផ្សាយ របស់ប្រទេសហូឡង់ បានរាយការណ៍កាលពីថ្ងៃពុធថា ស្ពាន Koningshaven ដ៏ល្បីល្បាញ ដែលត្រូវបានគេស្គាល់ជាទូទៅថា De Hef នឹងត្រូវរុះរើដោយផ្នែក ដោយផ្នែកកណ្តាល របស់វាត្រូវបានដកចេញ ជាបណ្តោះអាសន្ន ដូច្នេះនាវាកំសាន្ត របស់មហាសេដ្ឋី គឺលោក Jeff Bezos អាចធ្វើដំណើរឆ្លងកាត់បាន ។
យោងតាមសារព័ត៌មាន RT ចេញផ្សាយនៅថ្ងៃទី៣ ខែកុម្ភៈ ឆ្នាំ២០២២ បានឱ្យដឹងថា ការសាងសង់នាវាលំហែរ កាយដ៏ធំសម្បើម ដែលមានសសរចំនួន៣ ដែលត្រូវបាន រាយការណ៍ថា មានតម្លៃ ៤៣០ លានអឺរ៉ូ (៤៨៥ លានដុល្លារ) ត្រូវបានប្រគល់ឱ្យទៅជាអ្នកសាង សង់កប៉ាល់ Oceanco នៅ Alblasserdam ដែលជាទីប្រជុំជន ក្នុងខេត្ត South Holland របស់ប្រទេស ។ ទោះជាយ៉ាងណាក៏ដោយ កប៉ាល់ត្រូវឆ្លងកាត់ទីក្រុង Rotterdam ដើម្បីចូលទៅក្នុងសមុទ្រ ហើយមានទំហំធំពេក សម្រាប់ប្រឡោះនៃស្ពាន ។
ស្ពាន De Hef មានអាយុកាលតាំងពីឆ្នាំ ១៨៧៨ ។ កំណែប្រែទំនើប របស់ស្ពាននេះ ត្រូវបានបង្ហាញនៅឆ្នាំ ១៩២៧ ។ ស្ពាននេះត្រូវបានខូចខាត យ៉ាងធ្ងន់ធ្ងរ ដោយគ្រាប់បែកក្នុងកំឡុងសង្គ្រាម លោកលើកទីពីរ ស្ពាននេះគឺជាសំណង់មួយ ក្នុងចំណោមសំណង់ដំបូងគេ នៅក្នុងទីក្រុង ដែលត្រូវបានជួសជុលឡើងវិញ។ ស្ពាន De Hef បានឈប់ដំណើរការជាស្ពានផ្លូវដែកក្នុងឆ្នាំ ១៩៩៣ ហើយនៅតែជាបូជនីយដ្ឋានជាតិ ។
ក្រុមហ៊ុន Oceanco និងមហាសេដ្ឋី Bezos ត្រូវបានគេនិយាយថា បានព្រមព្រៀងក្នុងការចំណាយលើការងារលើស្ពាន។ ទោះជាយ៉ាងនេះក្តី អ្នកស្រុកខ្លះមានការខឹងសម្បារ ដែលស្ពានដែលគេស្រលាញ់ខ្លាំងនោះ នឹងត្រូវរុះរើ ជាពិសេសដោយសារតែមន្ត្រីបានសន្យាថា នឹងមិនអាចកាត់ផ្តាច់ស្ពានឡើយ ៕
ប្រែសម្រួលៈ ណៃ តុលា
