តេអេរ៉ង់ ៖ អ្នកនាំពាក្យ ក្រសួងការបរទេសអ៊ីរ៉ង់ បានឲ្យដឹងថា កិច្ចព្រមព្រៀងមួយនៅក្នុងកិច្ចចរចា ដែលកំពុងបន្តនៅទីក្រុងវីយែន ស្តីពីការស្ដារឡើងវិញ នូវកិច្ចព្រមព្រៀងនុយក្លេអ៊ែរឆ្នាំ២០១៥ កំពុងរង់ចាំការសម្រេចចិត្តផ្នែកនយោបាយ របស់ភាគីម្ខាងទៀត នេះបើយោងតាមទីភ្នាក់ងារ សារព័ត៌មានផ្លូវការ IRNA ។
លោក Saeed Khatibzadeh បានប្រាប់សន្និសីទសារព័ត៌មានប្រចាំសប្តាហ៍ ដោយកត់សម្គាល់ថា គណៈប្រតិភូកំពុង ធ្វើអន្តរកម្មមិនមាន “ទីបញ្ចប់” នៅទីក្រុងវីយែន នេះបើយោងតាមការចុះផ្សាយ របស់ទីភ្នាក់ងារសារព័ត៌មានចិនស៊ិនហួ ។
លោក Khatibzadeh បានបន្ថែមថា នៅពេលដែលពេលវេលាមកដល់ សម្រាប់ការចរចាអំពីបញ្ហាធ្ងន់ធ្ងរ កិច្ចពិភាក្សាក្លាយជាការលំបាក ដោយលោក Khatibzadeh បានទទួលស្គាល់ថា ទោះបីជាយ៉ាងណាក៏ដោយ ការចរចាកំពុងប្រឈមមុខនឹងភាពយឺតយ៉ាវ និងការអូសបន្លាយ។
លោកបានបន្ថែមថា លោកបានពិភាក្សាជាមួយអ្នកចរចាកំពូល របស់អ៊ីរ៉ង់ Ali Bagheri Kani អំពីនិន្នាការដែលឆ្លុះបញ្ចាំង ដោយកិច្ចពិភាក្សានៅទីក្រុងវីយែន កាលពីថ្ងៃចន្ទ ដោយកត់សម្គាល់ថា ការវិវឌ្ឍន៍នៅក្នុងរដ្ឋធានីអូទ្រីស បានលាតត្រដាងតាមរបៀបដែលបញ្ហាសំខាន់ៗមួយចំនួននៅតែមាន ដែលពិបាកនឹងសម្រេចចិត្ត។
លោកបានលើកឡើងថា កិច្ចព្រមព្រៀងមួយនៅក្នុងរដ្ឋធានីអូទ្រីស កំពុងរង់ចាំការសម្រេចចិត្តផ្នែក នយោបាយរបស់ភាគីម្ខាងទៀត ដោយលោកបានបន្ថែមថា “យើងកំពុងរង់ចាំទទួលការឆ្លើយតបចំពោះគំនិតផ្តួចផ្តើម និងសំណើរបស់យើង” ។
លោក Khatibzadeh បានបន្ថែមថា កាលណាសហរដ្ឋអាមេរិក និង ក្រុមប្រទេស E3 នៃប្រទេសបារាំង អង់គ្លេស និងអាល្លឺម៉ង់ បង្ហាញការប្តេជ្ញាចិត្ត “ចម្ងាយរបស់យើងកាន់តែខ្លី ពីការឈានដល់កិច្ចព្រមព្រៀងមួយ” ៕
ដោយ ឈូក បូរ៉ា
