ហាណូយ៖ ក្រសួងសុខាភិបាល របស់ប្រទេសវៀតណាម បានឲ្យដឹងថា ប្រទេសវៀតណាម បានកត់ត្រាករណីឆ្លងជំងឺកូវីដ-១៩ ថ្មីចំនួន ២៩,៤២៣ករណី ដែលជាការឆ្លងប្រចាំថ្ងៃខ្ពស់បំផុត នៅក្នុងប្រទេស ចាប់តាំងពីការចាប់ផ្តើម នៃជំងឺរាតត្បាត ដែលកើនឡើងចំនួន ៣០៣៤ករណី ចាប់ពីថ្ងៃអាទិត្យ។
ការឆ្លងថ្មីដែលបានចូលក្នុងតំបន់ ចំនួន ៦៣ទូទាំងប្រទេស រួមមាន ២៩,៤០៣ករណី ជាការឆ្លងក្នុងស្រុក និង ១០ករណីត្រូវបាននាំចូល នេះបើយោងតាមការចុះផ្សាយ របស់ទីភ្នាក់ងារសារព័ត៌មានចិនស៊ិនហួ។
រដ្ឋធានីហាណូយរបស់វៀតណាម នៅតែជាតំបន់ ដែលមានចំនួនអ្នកឆ្លងខ្ពស់បំផុត កាលពីថ្ងៃចន្ទ ដោយមានចំនួន ៣,៥០៧ ករណី បន្ទាប់មកខេត្ត Hai Duong ភាគខាងជើងមាន ១,៩១៥ ករណី និងទីក្រុង Hai Phong ភាគខាងជើងមាន ១,៤៨៩ ករណី។
ការឆ្លងថ្មី បានធ្វើឱ្យចំនួនសរុបកើនឡើង ដល់ ២,៥៤០,២៧៣ករណី ជាមួយនឹងការស្លាប់ចំនួន ៣៩,០៣៧នាក់។ នៅទូទាំងប្រទេស អ្នកជំងឺកូវីដ-១៩ ចំនួន ២,២៣២,៩៤៧នាក់ ឬ ៨៨ភាគរយ នៃអ្នកឆ្លងបានជាសះស្បើយ។
គួរបញ្ជាក់ថា យោងតាមក្រសួងបានឱ្យដឹងថា វ៉ាក់សាំងការពារជំងឺកូវីដ-១៩ ច្រើនជាង ១៨៦លានដូស រួមទាំងការចាក់វ៉ាក់សាំងទី៣ ចំនួន ៣២លានដូស ត្រូវបានគ្រប់គ្រង នៅក្នុងប្រទេសអាស៊ីអាគ្នេយ៍នេះ៕ ដោយ ឈូក បូរ៉ា
