ទិន្នន័យដែលក្រសួងពាណិជ្ជកម្មចិនចេញផ្សាយនាពេលថ្មីៗកន្លងមកបានបង្ហាញឱ្យឃើញថា នៅខែមករាឆ្នាំនេះ មិនបូករួមទាំងវិស័យធនាគារ មូលបត្រនិងការធានារ៉ាប់រង បរិមាណដើមទុនបរទេសដែលប្រទេសចិនប្រើប្រាស់ដោយជាក់ស្តែងបានឡើងដល់១សែន២ពាន់២៨០លានប្រាក់យាន់ចិន បានកើនជាង១១.៦ភាគរយបើប្រៀបធៀបនឹងរយៈពេលដូចគ្នានៃឆ្នាំមុន ត្រូវជា១៥៨៤០លានដុល្លារអាមេរិក ។ និយាយចំពោះប្រទេសចិន តួលេខគួរឱ្យកត់សម្គាល់នេះមិនត្រឹមតែមានន័យថា សម្រេចបាននូវកិច្ចចាប់ផ្តើមដ៏ល្អប្រសើរក្នុងឆ្នាំនេះលើវិស័យសេដ្ឋកិច្ចនិងពាណិជ្ជកម្មប៉ុណ្ណោះទេ ជាងនេះទៅទៀត បានបញ្ចេញព័ត៌មានគន្លឹះមួយទៅកាន់មជ្ឈដ្ឋានខាងក្រៅ ពោលគឺ៖អ្នកវិនិយោគទុនបរទេសនៅតែមានជំនឿចិត្តចំពោះទីផ្សារចិន ក្នុងនាមជាគោលដៅបណ្តាក់ទុន ចិននៅតែមានកម្លាំងទាក់ទាញខ្លាំងក្លាដដែល ។
ហេតុអ្វីបានជាអ្នកវិនិយោគបរទេសរីករាយបណ្តាក់ទុននៅប្រទេសចិន គឺដោយមកពីទីផ្សារចិនអាចនាំមកនូវផលកម្រៃជាទីគាប់ប្រសើរដល់ពួកគេ ។ ក្នុងបរិបទដែលវីរុសកូវីដ១៩នៅតែរីករាលដាលយ៉ាងធ្ងន់ធ្ងរ ការបណ្តាក់ទុនផ្ទាល់ពីបរទេសនៅលើពិភពលោកនៅតែមានភាពទន់ខ្សោយ តែនៅប្រទេសចិន សហគ្រាសបរទេសបែរជានាំគ្នាបន្ថែមបណ្តាក់ទុន នេះជាលទ្ធផលនៃការងារបង្ការនិងគ្រប់គ្រងជំងឺកូវីដ១៩ប្រកបដោយប្រសិទ្ធភាពផង ហើយក៏បានបង្ហាញឱ្យឃើញនូវភាពទាក់ទាញរបស់ទីផ្សារដ៏ធំធេងផងដែរ ។
និយាយចំពោះសហគ្រាសទុនបរទេស ជាបថម គឺផ្តោតសំខាន់ទៅលើសក្តានុពលកំណើនជាបន្តបន្ទាប់ក្នុងទីផ្សារធំរបស់ប្រទេសចិន ។ ទីផ្សារដែលមានសក្តានុពលដ៏ធំធេងបែបនេះធ្វើឱ្យទុនបរទេសពោពេញទៅដោយជំនឿចិត្ត ។ សហគ្រាសថ្មីដែលចូលក្នុងទីផ្សារចិនរំពឹងថា នឹងប្រកបអាជីវកម្មដោយមានភាពនឹងនរ រីឯ “មិត្តភក្តិចាស់”ដែលបានបណ្តាក់ទុនជាច្រើនឆ្នាំនៅប្រទេសចិនបានបង្ហាញពីគោលបំណងដែលចង់បន្តធ្វើអាជីវកម្មយ៉ាងស៊ីជម្រៅ ។
មូលហេតុមួយទៀតដែលអ្នកវិនិយោគបរទេសមានសុទិដ្ឋិនិយមចំពោះទីផ្សារចិន គឺនៅត្រង់ “បរិយាកាសទន់”នៃវិស័យវិនិយោគចិនមានភាពកាន់តែល្អប្រសើរជាបន្តបន្ទាប់ ។ ប្រទេសចិនបានអនុវត្តវិធានការជាច្រើនដើម្បីពង្រីកការបើកទូលាយនិងធ្វើឱ្យបរិយាកាសប្រកបអាជីវកម្មមានភាពកាន់តែល្អ ក្នុងន័យធ្វើឱ្យសហគ្រាសពហុជាតិដែលបណ្តាក់ទុននៅប្រទេសចិនកាន់តែទុកចិត្ត ។
នាពេលកន្លងទៅថី្មៗនេះ សភាពាណិជ្ជកម្មអាល្លឺម៉ង់នៅចិននិងទីភ្នាក់ងារKlynveld Peat Marwick Goerdeler បានចេញផ្សាយរបាយការណ៍រួមស្ដីពីការពិនិត្យអង្កេតជំនឿចិត្តខាងពាណិជ្ជកម្មពីឆ្នាំ២០២១-២០២២ ដោយបានបង្ហាញថា សហគ្រាសអាល្លឺម៉ង់ធ្វើអាជីវកម្មនៅចិនមានចំនួន៧១ភាគរយគ្រោងនឹងបន្ថែមបណ្តាក់ទុននៅប្រទេសចិន ។ ហើយលទ្ធផលកម្រងសំនួររបស់ក្រសួងពាណិជ្ជកម្មចិននាពេលថ្មីៗកន្លងទៅនេះបានបង្ហាញថា ក្នុងចំណោមសហគ្រាសទុនបរទសដ៏ធំសំខាន់ចំនួនជាង៣ពាន់ មានសហគ្រាសច្រើនដល់៩៤.៩ភាគរយមានសុទិដ្ឋិនិយមចំពោះការធ្វើអាជីវកម្មនៅចិននាពេលអនាគត ។
យោងតាម «កិច្ចព្រមព្រៀងស្តីពីទំនាក់ទំនងភាពជាដៃគូសេដ្ឋកិច្ចគ្រប់ជ្រុងជ្រោយក្នុងតំបន់ »ចូលជាធរមានតាមពេលកំណត់នៅថ្ងៃទី១ ខែមករាឆ្នាំនេះ នៅពេលអនាគត កិច្ចសហប្រតិបតិ្តការសេដ្ឋកិច្ចក្នុងតំបន់មុខជានឹងបង្កបង្កើតកាលានុវត្តភាពបណ្តាក់ទុកនៅប្រទេសចិនកាន់តែច្រើនឡើងៗ ។ និយាយចំពោះសេដ្ឋកិច្ចសកលដែលបាននិងកំពុងងើបឡើងវិញដោយទន់ខ្សោយ នេះក៏ជាកាលានុវត្តភាពដ៏មានតម្លៃណាស់ ។
សម្លឹងមើលទៅអនាគត ប្រទេសចិននឹងបន្តបញ្ចេញសក្តានុពលកំណើនកាន់តែច្រើន បន្តពង្រីកការបើកទូលាយចំពោះបរទេស និងបង្កបង្កើតបរិយាកាសប្រកបអាជីវកម្មដែលប្រកបដោយទីផ្សារភាវូបនីយកម្ម នីតិកម្មនិងសកលភាវូបនីយកម្ម ក៏ដូចជាចែករំលែកនូវផលប្រយោជន៍អភិវឌ្ឍសេដ្ឋកិច្ចដ៏មានគុណភាពកាន់តែច្រើនជាមួយពិភពលោក ។ អាចប៉ាន់ប្រមាណថា នឹងមានសហគ្រាសពហុជាតិកាន់តែច្រើនឡើងៗយល់ឃើញថា ការបណ្តាក់ទុននៅចិន នឹងទទួលបានកាលានុវត្តភាពកាន់តែច្រើននិងកាន់តែធំ ៕
