ស្តុកប្រេងឆៅ របស់អាមេរិកកើនឡើង ខណៈតម្លៃប្រេងឡើងថ្លៃ ចំពេលមានភាពតានតឹង លើវិបត្ដិអ៊ុយក្រែន

វ៉ាស៊ីនតោន៖ វិទ្យាស្ថានប្រេងអាមេរិក (API) កាលពីថ្ងៃពុធបានរាយការណ៍ ពីការកើនឡើងយ៉ាងឆាប់រហ័ស នៃប្រេងឆៅចំនួន ៥,៩៨៣ លានបារ៉ែលនៅក្នុងស្តុក របស់សហរដ្ឋអាមេរិក សម្រាប់សប្តាហ៍ដែលបញ្ចប់ នៅថ្ងៃទី១៨ ខែកុម្ភៈ។

អ្នកវិភាគបានរំពឹងថា នឹងមានការកើនឡើងប្រហែល ០,៧៦៧លានបារ៉ែល សម្រាប់សប្តាហ៍នេះ។ API បានរាយការណ៍ពីការធ្លាក់ចុះចំនួន ១,០៧៦ លានបារ៉ែលក្នុងសប្តាហ៍មុន។

តម្លៃប្រេងបានកើនឡើងខ្ពស់ កាលពីថ្ងៃពុធ ដោយសារភាពមិន ច្បាស់លាស់នៅតែមាន ចំពោះវិបត្តិអ៊ុយក្រែន នេះបើយោងតាមការចុះផ្សាយ របស់ទីភ្នាក់ងារសារព័ត៌មានចិនស៊ិនហួ ។

West Texas Intermediate សម្រាប់ការចែកចាយខែមេសាបានបន្ថែម ១៩ សេនដើម្បីទូទាត់នៅត្រឹមតម្លៃ ៩២,១០ដុល្លារអាមេរិក ក្នុងមួយបារ៉ែលនៅលើផ្សារហ៊ុន New York Mercantile Exchange ។

ប្រេងឆៅប្រភេទ Brent សម្រាប់ការចែកចាយខែមេសា បានបិទនៅតម្លៃ ៩៦,៨៤ ដុល្លារក្នុងមួយបារ៉ែល នៅលើផ្សារហ៊ុន London ICE Futures Exchange ។ តម្លៃប្រេងបានឡើងថ្លៃ កាលពីថ្ងៃអង្គារ ខណៈភាពតានតឹង ភូមិសាស្ត្រនយោបាយលើ អ៊ុយក្រែន បានកើនឡើង។

លោក Carsten Fritsch អ្នកវិភាគថាមពលនៅក្រុមហ៊ុន Commerzbank Research បានលើកឡើងថា “ការភ័យស្លន់ស្លោភាគច្រើនអំពី ការកើនឡើងបន្ថែមទៀតនៃ ជម្លោះរុស្ស៊ី-អ៊ុយក្រែន ហាក់ដូចជាបានកន្លងផុត ទៅសម្រាប់ពេលនេះ” ៕

ដោយ ឈូក បូរ៉ា