អង្គការសហប្រជាជាតិ៖ ក្រុមប្រឹក្សាសន្តិសុខអង្គការសហប្រជាជាតិ នឹងជួបប្រជុំគ្នានៅរសៀលថ្ងៃអាទិត្យដើម្បីរៀបចំការបោះឆ្នោត តាមនីតិវិធីលើសំណើរបស់អ៊ុយក្រែន សម្រាប់សម័យប្រជុំបន្ទាន់នៃមហាសន្និបាត ដែលមានសមាជិកចំនួន ១៩៣រូប ទាក់ទងនឹងការឈ្លានពានរបស់រុស្ស៊ី លើប្រទេសរបស់ខ្លួន។ នេះបើតាមការផ្សាយ របស់ទីភ្នាក់ងារព័ត៌មាន អាមេរិកាំង AP នៅមុននេះបន្តិច។
មិនមានការវេតូលើការបោះឆ្នោត តាមនីតិវិធីនៅក្នុងក្រុមប្រឹក្សាទេ ខុសពីដំណោះស្រាយ។ ការបោះឆ្នោតតាមនីតិវិធីតម្រូវឱ្យមានការយល់ព្រមពី សមាជិកក្រុមប្រឹក្សាចំនួនប្រាំបួន ក្នុងចំណោមសមាជិកក្រុមប្រឹក្សាទាំង ១៥។
អ្នកការទូតក្រុមប្រឹក្សាបាននិយាយថា ការអនុម័តគឺស្ទើរ តែប្រាកដហើយ កិច្ចប្រជុំបន្ទាន់នៃមហាសន្និបាត ត្រូវបានគេរំពឹងថា នឹងធ្វើឡើងនៅថ្ងៃចន្ទ។
ឯកអគ្គរដ្ឋទូត អង្គការសហប្រជាជាតិរបស់អ៊ុយក្រែនលោក Sergiy Kyslytsya បាននិយាយកាលពីថ្ងៃព្រហស្បតិ៍ថា លោកបានស្នើឱ្យប្រធានមហាសន្និបាត Abdulla Shahid រៀបចំសម្រាប់កិច្ចប្រជុំបន្ទាន់មួយនៅក្នុងប៉ុន្មានថ្ងៃខាងមុខនេះ។
លោកបាននិយាយថា កិច្ចប្រជុំគួរតែធ្វើឡើងក្រោម អ្វីដែលហៅថាដំណោះស្រាយ “រួបរួមដើម្បីសន្តិភាព” ដែលផ្តួចផ្តើមដោយសហរដ្ឋអាមេរិក និងបានអនុម័តក្នុងខែវិច្ឆិកា ឆ្នាំ 1950 ដើម្បីគេចវេតូដោយសហភាពសូវៀតក្នុងអំឡុងសង្គ្រាមកូរ៉េឆ្នាំ 1950-53 ។
ដំណោះស្រាយនេះផ្តល់អំណាច ដល់មហាសន្និបាត ក្នុងការហៅកិច្ចប្រជុំបន្ទាន់ ដើម្បីពិចារណាលើបញ្ហាសន្តិភាព និងសន្តិសុខអន្តរជាតិ នៅពេលដែលក្រុមប្រឹក្សាសន្តិសុខ មិនអាចធ្វើសកម្មភាពបាន ដោយសារតែខ្វះការឯកភាពគ្នាក្នុងចំណោមសមាជិកអចិន្ត្រៃយ៍ទាំងប្រាំ ដែលកាន់វេតូ – សហរដ្ឋអាមេរិក រុស្ស៊ី ចិន អង់គ្លេស និងបារាំង។
រុស្ស៊ីបានវេតូសេចក្តីសម្រេច របស់ក្រុមប្រឹក្សាសន្តិសុខកាលពីថ្ងៃសុក្រ ដោយទាមទារឱ្យក្រុងម៉ូស្គូបញ្ឈប់ការវាយប្រហាររបស់ខ្លួនលើអ៊ុយក្រែនជាបន្ទាន់ ហើយដកទ័ពទាំងអស់ចេញ។
ប្រែសម្រួលដោយ៖ សយ សុភា
