បរទេស៖ Facebook និង Twitter បាននិយាយកាលពីថ្ងៃសៅរ៍ថា ពួកគេបានរារាំងប្រព័ន្ធផ្សព្វផ្សាយ ដែលភ្ជាប់ដោយរដ្ឋរបស់រុស្ស៊ីពីការផ្សាយពាណិជ្ជកម្ម ឬរកប្រាក់ចេញ ពីវេទិការបស់ពួកគេ ដើម្បីឆ្លើយតបទៅនឹងប្រតិបត្តិការយោធា របស់ទីក្រុងម៉ូស្គូទៅលើប្រទេសអ៊ុយក្រែន។
យោងតាមសារព័ត៌មាន RT ចេញផ្សាយនៅថ្ងៃទី២៧ ខែកុម្ភៈ ឆ្នាំ២០២២ បានឱ្យដឹងថា Nathaniel Gleicher ប្រធានផ្នែកសន្តិសុខគោលនយោបាយនៅ Meta ដែលជាក្រុមហ៊ុនមេរបស់ Facebook បាននិយាយថា “ប្រព័ន្ធផ្សព្វផ្សាយរដ្ឋរបស់រុស្ស៊ី” ត្រូវបានហាមឃាត់មិនឱ្យ “ដំណើរការការផ្សាយពាណិជ្ជកម្ម ឬរកប្រាក់នៅលើវេទិកា របស់យើងគ្រប់ទីកន្លែងក្នុងពិភពលោក” ។
ចំណែក Twitter បាននិយាយថា ខ្លួនកំពុងផ្អាកការផ្សាយពាណិជ្ជកម្ម ជាបណ្ដោះអាសន្ន ក្នុងប្រទេសអ៊ុយក្រែន និងរុស្ស៊ី ដើម្បីធានាថា ព័ត៌មានមានសុវត្ថិភាពសាធារណៈសំខាន់ៗ ត្រូវបានកើនឡើង ហើយការផ្សាយពាណិជ្ជកម្មមិនរំខានពីវាឡើយ។
មុននេះ Google បាននិយាយថា ខ្លួនកំពុងរារាំងប្រព័ន្ធផ្សព្វផ្សាយរដ្ឋ របស់រុស្ស៊ី ពីការរកប្រាក់ពីការផ្សាយពាណិជ្ជកម្មនៅលើគេហទំព័រ កម្មវិធី និង YouTube របស់ពួកគេ ដោយលើកឡើងពី “ស្ថានភាពមិនធម្មតានៅក្នុងអ៊ុយក្រែន” ៕ ប្រែសម្រួលៈ ណៃ តុលា
