RIO DE JANEIRO – ប្រធានាធិបតីប្រេស៊ីលលោក Jair Bolsonaro និយាយថារដ្ឋាភិបាលរបស់លោក នឹងរក្សាអព្យាក្រឹត ចំពោះការលុកលុយរបស់រុស្ស៊ី លើអ៊ុយក្រែន។ នេះបើតាមទីភ្នាក់ងារព័ត៌មានអាមេរិកាំង AP នៅមុននេះបន្តិច។
ប្រទេសប្រេស៊ីល ជាសមាជិក BRICS (Brazil, Russia, India, China and South Africa)។
លោក Bolsonaro បាននិយាយថា លោកមានការសន្ទនា រយៈពេលពីរម៉ោង ជាមួយប្រធានាធិបតីរុស្ស៊ី លោក Vladimir Putin កាលពីថ្ងៃអាទិត្យ ដើម្បីនិយាយអំពីសង្រ្គាម និងបានធានាដល់មេដឹកនាំរុស្ស៊ីថា ប្រទេសប្រេស៊ីលនឹងរក្សាជំហរអព្យាក្រឹត។ ទោះបីជាយ៉ាងណាក៏ដោយ ក្រសួងការបរទេសរបស់ប្រទេសប្រេស៊ីល ក្រោយមកបាននិយាយថា លោក Bolsonaro មិនបាននិយាយទៅកាន់លោក Putin កាលពីថ្ងៃអាទិត្យនោះទេ ប៉ុន្តែជាការសំដៅទៅលើកិច្ចប្រជុំ រយៈពេលពីរម៉ោងរបស់គាត់ ជាមួយរុស្ស៊ី ក្នុងអំឡុងដំណើរទស្សនកិច្ច ទៅកាន់ទីក្រុងមូស្គូកាលពីដើមខែនេះ។
ប្រធានាធិបតីអភិរក្សនិយមជ្រុលរបស់ប្រេស៊ីល បាននិយាយកាលពីថ្ងៃអាទិត្យថាលោកមិនចង់ “នាំយកផលវិបាកនៃជម្លោះ” មកឲ្យប្រេស៊ីលទេ។
Bolsonaro និយាយថា រុស្ស៊ីគ្មានចេតនាធ្វើការសម្លាប់រង្គាល ណាមួយឡើយ ហើយថានៅតំបន់ខ្លះនៃអ៊ុយក្រែន “៩០% នៃប្រជាជនចង់ចូលជិតរុស្ស៊ី”។
ប្រធានាធិបតីប្រេស៊ីល ក៏បានរិះគន់ប្រធានាធិបតីអ៊ុយក្រែនលោក Volodymyr Zelenskyy ដោយនិយាយថាប្រជាជន “ប្រគល់ជោគវាសនារបស់ប្រទេសទៅជាតារាកំប្លែង” ។
ប្រែសម្រួលដោយ៖ សយ សុភា
Recommended for you
