បរទេស ៖ ក្រសួងការពារជាតិរុស្ស៊ី បាននិយាយនៅក្នុងសន្និសីទ សារព័ត៌មានមួយ នៅថ្ងៃពុធថា កងទ័ពរុស្ស៊ីបានដណ្តើម យកទីក្រុង Kherson ដែលជារដ្ឋធានីខេត្ត នៅផ្នែកឆ្នេរសមុទ្រភាគខាងត្បូង នៃប្រទេសអ៊ុយក្រែន ។
ក្រសួងការពារជាតិរុស្ស៊ី ក៏បានបញ្ជាក់ផងដែរ អំពីការវាយប្រហារលើអ្វី ដែលខ្លួនបានអះអាងថា ជាផ្នែកមួយនៃហេដ្ឋារចនាសម្ព័ន្ធផ្លូវចិត្ត របស់ប្រទេសអ៊ុយក្រែន រួមទាំងប៉មទូរទស្សន៍ក្នុងទីក្រុងគៀវផងដែរ ។
យោងតាមសារព័ត៌មាន RT ចេញផ្សាយនៅថ្ងៃទី២ ខែមីនា ឆ្នាំ២០២២ បានឱ្យដឹងថា ក្រសួងបានបញ្ជាក់ថា ហេដ្ឋារចនាសម្ព័ន្ធស៊ីវិលនៅទីក្រុង Kherson កំពុងដំណើរការជាធម្មតា ដោយមិនមានការខ្វះខាតស្បៀងអាហារ ឬសម្ភារៈចាំបាច់ផ្សេងទៀតឡើយ។
ក្រសួងការពារជាតិរុស្ស៊ី ក៏បន្ថែមថា រដ្ឋាភិបាលរបស់ទីក្រុង និង យោធារុស្ស៊ី បានចូលរួមនៅក្នុងកិច្ចពិភាក្សា អំពីរបៀបធានាសណ្តាប់ធ្នាប់ និងសុវត្ថិភាព សាធារណៈនៅក្នុងតំបន់។ អ្នកនាំពាក្យក្រសួង Igor Konashenkov បានរាយការណ៍ថា កងកម្លាំងរុស្ស៊ី នៅអ៊ុយក្រែន បានវាយប្រហារ ទីតាំងយោធា បន្ថែមជាង ៦០ ដោយជំរុញឱ្យចំនួនសរុប នៃធាតុដែលត្រូវបានបំផ្លាញ នៃហេដ្ឋារចនាសម្ព័ន្ធយោធាអ៊ុយក្រែនដល់ជាង ១ ៥០០ ៕
ប្រែសម្រួលៈ ណៃ តុលា
