វីយែន៖ លោក Enrique Mora អគ្គលេខាធិការរងនៃ សេវាកម្មសកម្មភាព ខាងក្រៅរបស់អឺរ៉ុប បានឲ្យដឹងថា ការសម្រេចចិត្តនយោបាយ ចាំបាច់ត្រូវធ្វើដើម្បីបញ្ចប់ កិច្ចចរចានៅទីក្រុងវីយែន ស្តីពីការរស់ឡើងវិញនូវ កិច្ចព្រមព្រៀងនុយក្លេអ៊ែរអ៊ីរ៉ង់ ឆ្នាំ២០១៥ ។
លោក Mora បានឲ្យដឹងនៅលើបណ្ដាញ Twitter ថា “វាដល់ពេលហើយនៅប៉ុន្មានថ្ងៃខាងមុខ សម្រាប់ការសម្រេចចិត្តនយោបាយ ដើម្បីបញ្ចប់កិច្ចចរចានៅទីក្រុងវីយែន” នេះបើយោងតាមការចុះផ្សាយ របស់ទីភ្នាក់ងារសារព័ត៌មានចិនស៊ិនហួ។
លោក Mora កំពុងដើរតួជាអ្នកសម្របសម្រួល របស់សហភាពអឺរ៉ុប ក្នុងការចរចានៅទីក្រុងវីយែន។ ការអត្ថាធិប្បាយរបស់លោក បានធ្វើឡើង ខណៈដែលអ្នកនាំពាក្យ ក្រសួងការបរទេសអ៊ីរ៉ង់លោក Saeed Khatibzadeh បានឲ្យដឹងនៅក្នុងទីក្រុងតេអេរ៉ង់ កាលពីថ្ងៃចន្ទថា ភាពខុសប្លែកគ្នាតិចតួច នៅតែមានរវាងអ៊ីរ៉ង់ និងលោកខាងលិច។
លោក Khatibzadeh បានលើកឡើងថា “ប្រសិនបើវិធីសាស្រ្តរបស់សហរដ្ឋអាមេរិក សមហេតុផល កិច្ចព្រមព្រៀងឆាប់រហ័សមួយ គឺអាចរកបាន” ។ ទោះបីជាយ៉ាងណាក៏ដោយ លោកបានសង្កត់ធ្ងន់ថា អ៊ីរ៉ង់នឹងមិនទទួលយក ឬប្រកាន់ខ្ជាប់នូវពេលវេលាកំណត់ សម្រាប់ការចរចាឡើយ ៕
ប្រែសម្រួល ឈូក បូរ៉ា
