លោក Zelensky ត្រៀមខ្លួនជាស្រេច សម្រាប់ការសន្ទនាជាមួយរុស្ស៊ី លើការធានាសន្តិសុខ រួមទាំងតំបន់ Donetsk និងLugansk

គៀវ៖ អ៊ុយក្រែនត្រៀមខ្លួនជាស្រេច ដើម្បីធ្វើកិច្ចសន្ទនាជាមួយរុស្ស៊ី លើការធានាសន្តិសុខ និងអនាគតរបស់តំបន់ Donetsk, Lugansk និង Crimea នេះបើយោងទៅតាមសេចក្តីប្រកាសព័ត៌មាន ដែលបានបង្ហោះនៅលើគេហទំព័រផ្លូវការ របស់ប្រធានាធិបតីអ៊ុយក្រែន។

ប្រធានាធិបតីអ៊ុយក្រែនលោក Volodymyr Zelensky បានឲ្យដឹងនៅក្នុងបទសម្ភាសន៍ជាមួយ ABC News ថាអ៊ុយក្រែនចាំបាច់ ត្រូវមានកិច្ចព្រមព្រៀងសន្តិសុខរួម ជាមួយប្រទេសជិតខាងទាំងអស់ និងសហរដ្ឋអាមេរិក បារាំង អាល្លឺម៉ង់ និងតួកគី នេះបើយោងតាម សេចក្តីប្រកាសព័ត៌មាន។

លោក Zelensky បានលើកឡើងថា “យើងត្រៀមខ្លួនរួចជាស្រេច សម្រាប់ការធានាណាមួយនៃ សន្តិសុខរបស់ប្រទេសរបស់យើង ពីរដ្ឋរៀងៗខ្លួនដែលត្រូវតែធានា។ ហើយរុស្ស៊ីក៏ស្ថិត ក្នុងចំណោមរដ្ឋទាំងនេះដែរ ពីព្រោះប្រទេសរុស្ស៊ី គឺជាអ្នកជិតខាងរបស់យើង”។

លោកបានបញ្ជាក់ថាថា “ទាំងនេះនឹងជាការធានា មិនត្រឹមតែសម្រាប់អ៊ុយក្រែនប៉ុណ្ណោះទេ ទាំងនេះក៏នឹងជាការធានា សម្រាប់រុស្ស៊ីផងដែរ ដែលខ្លួនកំពុងនិយាយ ឥតឈប់ឈររហូតមក ៕

ប្រែសម្រួល ឈូក បូរ៉ា