ប៉េកាំង៖ កិច្ចសហប្រតិបត្តិការរវាង មហាអំណាចចិន-អាមេរិក ផ្តល់ផលប្រយោជន៍ដល់ប្រទេសទាំងពីរ និងពិភពលោក នាយករដ្ឋមន្ត្រីចិនលោក Li Keqiang បានលើកឡើងថា គួរតែមានការសន្ទនា និងការប្រាស្រ័យទាក់ទងគ្នាបន្ថែមទៀត រវាងប្រទេសទាំងពីរ។
លោក Li បានធ្វើការកត់សម្គាល់ នៅក្នុងសន្និសីទសារព័ត៌មានមួយ បន្ទាប់ពីការបញ្ចប់នៃសម័យ ប្រជុំសភាជាតិប្រចាំឆ្នាំ របស់ប្រទេសចិន ឲ្យដឹងថា ការទទួលបាននូវទំនាក់ទំនង ត្រឹមត្រូវរវាងប្រទេសចិន-អាមេរិក លើសុខុមាលភាព ប្រជាជន នៃប្រទេសទាំងពីរ។
លោក Li បានបន្ដថា ប្រទេសចិន និងសហរដ្ឋអាមេរិក គឺជាសមាជិកអចិន្ត្រៃយ៍នៃ ក្រុមប្រឹក្សាសន្តិសុខអង្គការសហប្រជាជាតិ ហើយប្រទេសចិន និងសហរដ្ឋអាមេរិក គឺជាប្រទេសកំពុងអភិវឌ្ឍន៍ និងជាប្រទេសអភិវឌ្ឍន៍ដ៏ធំបំផុត របស់ពិភពលោករៀងៗខ្លួន ។
លោកបានបន្តថា បញ្ហាប្រឈមជាសាកលជាច្រើន តម្រូវឱ្យមានកិច្ចខិតខំប្រឹងប្រែងរួមគ្នា និងកិច្ចសហប្រតិបត្តិការ របស់ប្រទេសទាំងពីរ នេះបើយោងតាមការចុះផ្សាយ របស់ទីភ្នាក់ងារសារព័ត៌មានចិនស៊ិនហួ។
កាលពី ៥០ឆ្នាំមុន ប្រទេសទាំងពីរបានបំបែក ផ្ទាំងទឹកកកនៃទំនាក់ទំនង ហើយបានចាប់ផ្តើមដំណើរនៃ ការធ្វើឱ្យទំនាក់ទំនងទ្វេភាគី មានលក្ខណៈធម្មតា។ នាយករដ្ឋមន្ត្រី បានលើកឡើងថា ទំនាក់ទំនងបានឈានទៅមុខ ក្នុងរយៈពេលកន្លះសតវត្សកន្លងមកនេះ ។
ប្រទេសចិនសង្ឃឹមថា ប្រទេសទាំងពីរនឹងធ្វើសកម្មភាព ស្របតាមការយោគយល់គ្នា ដែលសម្រេចបាននៅក្នុង កិច្ចប្រជុំនិម្មិតរវាងប្រធានាធិបតី នៃប្រទេសនានាកាលពីចុងឆ្នាំមុន គោរពផលប្រយោជន៍ស្នូល និងកង្វល់ធំៗរបស់គ្នាទៅវិញទៅមក រស់នៅជាមួយគ្នាដោយសន្តិភាព និងបន្តការឈ្នះ-ឈ្នះ លើកិច្ចសហប្រតិបត្តិការ ៕
ប្រែសម្រួល ឈូក បូរ៉ា
