តម្លៃប្រេង បន្ដធ្លាក់ចុះ ខណៈចាប់ផ្ដើមមានដំណោះស្រាយ លើបញ្ហាផ្គត់ផ្គង់

ញូវយ៉ក៖ តម្លៃ​ប្រេង​បានបន្ដធ្លាក់​ចុះ​កាលពី​ថ្ងៃ​អង្គារ ខណៈ​ក្តី​បារម្ភ​ជុំវិញ​ការ​រំខាន​ដល់​ការ​ផ្គត់ផ្គង់​បាន​ធូរស្រាលឡើងវិញ នេះបើយោងតាមការចុះផ្សាយរបស់ទីភ្នាក់ងារសារព័ត៌មានចិនស៊ិនហួ។

West Texas Intermediate (WTI) សម្រាប់ការចែកចាយខែមេសាបានបាត់បង់ ៦,៥៧ដុល្លារ ឬ ៦,៤ភាគរយ មកទូទាត់នៅ តម្លៃ ៩៦,៤៤ ដុល្លារក្នុងមួយបារ៉ែលនៅលើផ្សារហ៊ុន New York Mercantile Exchange ។

ប្រេងឆៅប្រភេទ Brent សម្រាប់ចែកចាយនៅខែឧសភា បានធ្លាក់ចុះ ៦,៩៩ ដុល្លារ ឬ ៦,៥ ភាគរយ មកបិទនៅតម្លៃ ៩៩,៩១ ដុល្លារក្នុងមួយបារ៉ែល នៅលើផ្សារហ៊ុន London ICE Futures Exchange ។

នៅថ្ងៃច័ន្ទប្រេងប្រភេទ WTI និង Brent បានធ្លាក់ចុះ ៥,៨ ភាគរយនិង ៥,១ ភាគរយរៀងគ្នា។ការ​ធ្លាក់ចុះគួរ​ឱ្យ​កត់​សម្គាល់​បាន​កើត​ឡើង​នៅ​ពេល​ដែល​ការ​ចរចា​រវាង​តំណាង​រុស្ស៊ី និង​អ៊ុយក្រែន កំពុង​តែ​ផ្តល់​នូវ​ក្តី​សង្ឃឹម​នៃ​ការ​សហការ​គ្នា​។

លោក Carsten Fritsch អ្នកវិភាគថាមពលនៅក្រុមហ៊ុន Commerzbank Research បានឲ្យដឹងកាលពីថ្ងៃអង្គារថា “ក្តីសង្ឃឹមនៃបទឈប់បាញ់នៅក្នុងប្រទេសអ៊ុយក្រែន គឺនៅពីក្រោយការធ្លាក់ចុះនៃតម្លៃប្រេង និងឧស្ម័ន” ។

លោក​បាន​បន្ត​ថា ការ​ព្រួយ​បារម្ភ​នៃ​ការ​ផ្គត់​ផ្គង់​ត្រូវ​បាន​ធូរ​ស្រាល​ផង​ដែរ ខណៈ​ផលិតកម្ម​ប្រេង​របស់​រុស្ស៊ី​នៅ​តែ​ហាក់​ដូច​ជា​ដំណើរការ​ដូច​ធម្មតា បើ​ទោះ​បី​ជា​មាន​ការ​ដាក់​ទណ្ឌកម្ម និង​បញ្ហា​នៃ​ការ​លក់​ប្រេង​ក៏​ដោយ។

ទីភ្នាក់ងារសារព័ត៌មានក្នុងស្រុក Ukrayinska Pravda បានរាយការណ៍ដោយដកស្រង់សម្តីលោក David Arakhamia សមាជិកនៃគណៈប្រតិភូអ៊ុយក្រែនថា គណៈប្រតិភូអ៊ុយក្រែន និងរុស្ស៊ី បានបន្តកិច្ចចរចាសន្តិភាពកាលពីថ្ងៃអង្គារ៕ប្រែសម្រួល ឈូក បូរ៉ា