ខ្មាន់កាំភ្លើងបើកការ វាយប្រហារនៅនីហ្សេរីយ៉ា បណ្តាលឲ្យស្លាប់មនុស្សតិចបំផុត ៣៤នាក់

អាប៊ូចា៖ ទីភ្នាក់ងារព័ត៌មានចិនស៊ិនហួ បានផ្សព្វផ្សាយនៅថ្ងៃទី២៣ ខែមីនា ឆ្នាំ២០២២ថា យ៉ាងហោចណាស់មនុស្ស ៣៤នាក់ ត្រូវបានសម្លាប់បន្ទាប់ពី ការវាយប្រហារដោយខ្មាន់កាំភ្លើង ដែលបានលុកលុយភូមិចំនួន៤ នៅក្នុងរដ្ឋ Kaduna ភាគពាយ័ព្យនៃប្រទេសនីហ្សេរីយ៉ា កាលពីថ្ងៃអាទិត្យ ។

មនុស្ស៧នាក់បានរងរបួស ខណៈដែលផ្ទះជាង២០០ខ្នង និងហាងចំនួន៣២កន្លែង ត្រូវបានដុតបំផ្លាញក្នុងអំឡុងពេល ការវាយប្រហារកាលពីយប់ ថ្ងៃអាទិត្យលើភូមិ Tsonje, Agban, Katanga និង Kadarko នៅក្នុងតំបន់រដ្ឋាភិបាលក្នុងតំបន់ Kaura នៃរដ្ឋ Kaduna ។ លោក Samuel Aruwan ស្នងការរដ្ឋទទួលបន្ទុកសន្តិសុខផ្ទៃក្នុង និងកិច្ចការលំនៅដ្ឋានបានលើកឡើង នៅឯសន្និសីទសារព័ត៌មាននៅទីក្រុង Kaduna រដ្ឋធានីនៃរដ្ឋនេះថាយ៉ាងដូច្នេះ ។

លោក Aruwan បានលើកឡើងថា រថយន្តចំនួន៣គ្រឿង និងម៉ូតូ១៧គ្រឿង ក៏ត្រូវបានបំផ្លាញដោយ ខ្មាន់កាំភ្លើងដែលមូលហេតុនៃ ការវាយប្រហារនេះនៅមិនទាន់ដឹងនៅឡើយទេ ។

មន្ត្រីក្នុងតំបន់បានឲ្យដឹងថា បម្រាមគោចររយៈពេល ២៤ម៉ោង ត្រូវបានដាក់លើតំបន់រដ្ឋាភិបាលក្នុងតំបន់ បន្ទាប់ពីមានការវាយប្រហារ ដោយបន្ថែមបម្រាមគោចរ នឹងនៅតែជាធរមាន ហើយមានសារៈសំខាន់ណាស់ក្នុងការ ត្រួតពិនិត្យការអនុម័តលើច្បាប់ និងរៀបចំសណ្តាប់ធ្នាប់បន្ថែមទៀត នៅក្នុងភូមិដែលរងផលប៉ះពាល់ ៕

ប្រែសម្រួលដោយ៖ ម៉ៅ បុប្ផាមករា