ប៉េកាំង៖ ប្រទេសចិន បានទាមទារឱ្យសហរដ្ឋអាមេរិក លុបចោលជាបន្ទាន់នូវទណ្ឌកម្ម ដែលដាក់ប្រឆាំងនឹងមន្ត្រីចិន សម្រាប់ការរំលោភសិទ្ធិមនុស្ស ដោយព្រមានថា បើមិនដូច្នេះទេសហរដ្ឋអាមេរិក នឹងត្រូវប្រឈមមុខនឹង វិធានការតបតវិញពីប្រទេសចិន។
អ្នកនាំពាក្យក្រសួងការបរទេសចិន លោក Wang Wenbin បានប្រាប់អ្នកសារព័ត៌មានថា “សេចក្តីថ្លែងការណ៍ របស់សហរដ្ឋអាមេរិក ពោរពេញទៅដោយការ លំអៀងមនោគមវិជ្ជា និងការភូតកុហកផ្នែកនយោបាយ ធ្វើឱ្យខូចកិត្តិយសប្រទេសចិន និងគាបសង្កត់មន្ត្រីចិន ដោយគ្មានហេតុផល។
លោក Wang បានលើកឡើងថា ប្រទេសចិនប្រឆាំងយ៉ាងខ្លាំង ចំពោះបញ្ហានេះ។ លោកបន្ដថា “អ្នករំលោភសិទ្ធិមនុស្សដ៏អាក្រក់បំផុត នៅក្នុងពិភពលោក គឺសហរដ្ឋអាមេរិក” ដោយកត់សម្គាល់ថា មហាអំណាចមួយនេះ គួរតែប្រែចិត្ត ចំពោះការសម្លាប់ជនជាតិដើមអាមេរិកាំង និងកាត់បន្ថយចំនួនប្រជាជន របស់ពួកគេមកត្រឹម ២៥ម៉ឺន នៅដើមសតវត្សទី២០ ពី ៥លាននាក់នៅចុងសតវត្សទី១៥ ។
លោក Wang បានបន្ថែមថា នៅចំពោះមុខការស្លាប់ជិត ១លាននាក់នៃជំងឺកូវីដ-១៩ ជនរងគ្រោះដោយ អំពើហិង្សាដោយកាំភ្លើងជាង ៤០០០០នាក់ក្នុងមួយឆ្នាំៗ និងរាប់ម៉ឺននាក់នៃជនរងគ្រោះនៃ ការរើសអើងជាតិសាសន៍ សហរដ្ឋអាមេរិក គួរតែឆ្លុះបញ្ចាំងពីឱនភាព សិទ្ធិមនុស្សរបស់ខ្លួន ៕
ប្រែសម្រួល ឈូក បូរ៉ា
