ប៉េកាំង៖ ប្រទេសចិន បានអំពាវនាវឱ្យមានការអត់ធ្មត់ ចំពោះបញ្ហានុយក្លេអ៊ែរឧបទ្វីបកូរ៉េ បន្ទាប់ពីការបាញ់សាកល្បងមីស៊ីលផ្លោងអន្តរទ្វីបត្រូវបានធ្វើឡើងដោយកូរ៉េខាងជើងកាលពីថ្ងៃមុន នេះបើយោងតាមការចុះផ្សាយ របស់ទីភ្នាក់ងារសារព័ត៌មានចិនស៊ិនហួ។
តំណាងអចិន្ត្រៃយ៍របស់ប្រទេសចិន ប្រចាំនៅអង្គការសហប្រជាជាតិលោក Zhang Jun បានឲ្យដឹងថា “ក្រោមកាលៈទេសៈបច្ចុប្បន្ន យើងអំពាវនាវឱ្យភាគី ពាក់ព័ន្ធរក្សាភាពស្ងប់ស្ងាត់ អនុវត្តការអត់ធ្មត់ រក្សាផ្លូវត្រឹមត្រូវនៃការសន្ទនា និងការពិគ្រោះយោបល់ និងជៀសវាងការចាត់វិធានការណាមួយ ដែលអាចធ្វើអោយភាពតានតឹង កាន់តែធ្ងន់ធ្ងរ និងនាំឱ្យមានការគណនាខុស”។
លោក Zhang បានលើកឡើងថា “ក្នុងនាមជាប្រទេសជិតខាងទ្វារនៃឧបទ្វីប ប្រទេសចិន បានជាប់លាប់ក្នុងការតស៊ូមតិ និងលើកកម្ពស់សន្តិភាព និងស្ថិរភាពរបស់ឧបទ្វីបនេះ ការលុបបំបាត់នុយក្លេអ៊ែរ និងវិធីសាស្រ្ត នៃការស្វែងរកដំណោះស្រាយតាមរយៈការសន្ទនា និងការពិគ្រោះយោបល់”។
លោក Zhang បានបន្ថែមថា “យើងសង្ឃឹមថា រដ្ឋជាសមាជិកអង្គការសហប្រជាជាតិ និងកូរ៉េខាងជើង នឹងបន្តកិច្ចសន្ទនា និងការចូលរួមយ៉ាងសកម្មក្នុងការស្វែងរកដំណោះស្រាយ ប្រកបដោយប្រសិទ្ធភាព ដើម្បីដោះស្រាយភាពខុសគ្នារបស់ពួកគេ”។
លោក Zhang បានឲ្យដឹងថា ភាគីផ្ទាល់ចំពោះបញ្ហាឧបទ្វីប គឺសហរដ្ឋអាមេរិក និងកូរ៉េខាងជើង គួរតែធ្វើការចរចាដោយផ្ទាល់ឡើងវិញដោយមិនបង្អង់យូរឡើយ។
បេសកជនរូបនេះបានកត់សម្គាល់ថា “វាជាការត្រឹមត្រូវ និងត្រឹមត្រូវសម្រាប់ភាគីសហរដ្ឋអាមេរិក ដើម្បីបង្ហាញពីសុច្ឆន្ទៈរបស់ខ្លួន ចាត់វិធានការ ដែលពាក់ព័ន្ធជាក់ស្តែង និងខិតខំធ្វើឱ្យស្ថានការណ៍មានស្ថិរភាព កសាងទំនុកចិត្តគ្នាទៅវិញទៅមក និងចាប់ផ្តើមការសន្ទនាឡើងវិញ”៕ ប្រែសម្រួល ឈូក បូរ៉ា
