វ៉ាស៊ីនតោន ៖ កាសែត New York Times បានរាយការណ៍ដោយដកស្រង់ ពីរដ្ឋបាលសហរដ្ឋអាមេរិកថា សហរដ្ឋអាមេរិក នឹងធ្វើការជាមួយសម្ព័ន្ធមិត្ត ដើម្បីផ្ទេររថក្រោះ ផលិតដោយសូវៀត ទៅកាន់អ៊ុយក្រែន ដើម្បីពង្រឹងការការពារ របស់ខ្លួននៅក្នុងតំបន់ ដុនបាស ជាផ្លូវការ។
យោងតាមកាសែតខាងលើបានឱ្យដឹងថា ការផ្ទេរដែលស្នើសុំដោយប្រធានាធិបតី អ៊ុយក្រែន លោក Volodymyr Zelenskiy នឹងចាប់ផ្តើមក្នុងពេលឆាប់ៗនេះ ។ កាសែតនេះបានចុះផ្សាយថា មន្ត្រីរូបនេះបានបដិសេធ មិននិយាយថា តើរថក្រោះប៉ុន្មានគឿងនឹងត្រូវបញ្ជូន ឬមកពីប្រទេសណាខ្លះនោះទេ ។
មន្ទីរបញ្ចកោណ បានបដិសេធមិនធ្វើអត្ថាធិប្បាយ ទៅកាន់ទីភ្នាក់ងារ សារព័ត៌ Reuters នោះទេ ហើយសេតវិមាន មិនបានឆ្លើយតបភ្លាមៗ ចំពោះសំណើសុំការ អត្ថាធិប្បាយដែរ។
យោងតាមកាសែត NewYorkTimes បានឱ្យដឹងថា រថក្រោះនេះនឹងអនុញ្ញាត ឱ្យអ៊ុយក្រែនធ្វើការវាយប្រហារ ដោយកាំភ្លើងធំរយៈចម្ងាយឆ្ងាយ ទៅលើគោលដៅរបស់រុស្ស៊ីនៅក្នុងតំបន់ដុនបាស ភាគអាគ្នេយ៍ អ៊ុយក្រែន ជាប់ព្រំដែនរុស្ស៊ី។
កាសែតនេះបានចុះផ្សាយឲ្យដឹងទៀតថា វាជាលើកដំបូងនៅក្នុងសង្រ្គាម ដែលសហរដ្ឋអាមេរិក បានជួយផ្ទេររថក្រោះទៅឲ្យបរទេស ដូចជាប្រទេសអ៊ុយក្រែន បច្ចុប្បន្ននេះ ៕ប្រែសម្រួល ឈូក បូរ៉ា
