វ៉ាស៊ីនតោន៖ រដ្ឋមន្ត្រីក្រសួងរតនាគារលោកស្រី Janet Yellen បានលើកឡើងថា សហរដ្ឋអាមេរិក ត្រៀមធ្វើពហិការមិនចូលរួមកិច្ចប្រជុំមួយចំនួនទាក់ទងនឹងក្រុមប្រទេសសេដ្ឋកិច្ចធំៗ G20 ប្រសិនបើមានមន្ត្រីរុស្ស៊ីចូលរួមនោះ ចំពេលមានភាពតានតឹងដែលកំពុងបន្តជាមួយទីក្រុងម៉ូស្គូ ជុំវិញការឈ្លានពានអ៊ុយក្រែន។
ប្រធានាធិបតីអាមេរិកលោក ចូ បៃដិន បានអះអាងថា រុស្ស៊ីគួរតែដកចេញពីក្រុមប្រទេស G-20 ដែលរួមមានប្រទេសអភិវឌ្ឍន៍ និងសេដ្ឋកិច្ចធំៗ នេះបើយោងតាមការចុះផ្សាយរបស់ទីភ្នាក់ងារសារព័ត៌មានក្យូដូជប៉ុន។
លោកស្រី Yellen បានប្រាប់សវនាការសភាថា “លោកប្រធានាធិបតី បៃដិន បានបញ្ជាក់យ៉ាងច្បាស់ ហើយខ្ញុំពិតជាយល់ស្របជាមួយលោកថា វាមិនអាចជាអាជីវកម្ម ដូចធម្មតាសម្រាប់ប្រទេសរុស្ស៊ី នៅក្នុងស្ថាប័នហិរញ្ញវត្ថុណាមួយនោះទេ”។
លោកស្រីបានបន្ថែមថា “លោកបានស្នើសុំឱ្យមានការដករុស្ស៊ីចេញពី G-20 ហើយខ្ញុំបានបញ្ជាក់យ៉ាងច្បាស់ទៅកាន់សហសេវិករបស់ខ្ញុំនៅក្នុងប្រទេសឥណ្ឌូនេស៊ីថា យើងនឹងមិនចូលរួមក្នុងកិច្ចប្រជុំមួយចំនួនប្រសិនបើជនជាតិរុស្ស៊ីនៅទីនោះ” ដែលប្រទេសឥណ្ឌូណេស៊ី គឺជាប្រធានបង្វិលប្រចាំឆ្នាំរបស់ក្រុមប្រទេស G20។
យោងតាមសារព័ត៌មាន Reuters អ្នកនាំពាក្យរតនាគារក្រោយមកបានឲ្យដឹងថាលោកស្រី Yellen កំពុងសំដៅទៅលើកិច្ចប្រជុំ G-20 នៅថ្ងៃទី២០ ខែមេសា នៅខាងក្រៅកិច្ចប្រជុំនិទាឃរដូវនៃមូលនិធិរូបិយវត្ថុអន្តរជាតិ និងធនាគារពិភពលោកនៅទីក្រុងវ៉ាស៊ីនតោន និងកិច្ចប្រជុំសមាជិកសភាពាក់ព័ន្ធ។
វាមិនច្បាស់ទេថាតើរុស្ស៊ី នឹងចូលរួមក្នុងការប្រមូលផ្តុំរដ្ឋមន្ត្រីហិរញ្ញវត្ថុ និងទេសាភិបាលធនាគារកណ្តាល ដែលនឹងក្លាយជាកិច្ចពិភាក្សាថ្នាក់រដ្ឋមន្ត្រី G-20 លើកដំបូងដែលត្រូវបានធ្វើឡើងចាប់តាំងពីរុស្ស៊ីបានចាប់ផ្តើមយុទ្ធនាការយោធាប្រឆាំងនឹងអ៊ុយក្រែននៅថ្ងៃទី២៤ ខែកុម្ភៈ៕ប្រែសម្រួល ឈូក បូរ៉ា
