ទ្វារសម្រាប់ការបើកទូលាយ របស់ប្រទេសចិន នឹងមិនបិទឡើយ នឹងបើកទូលាយកាន់តែខ្លាំងឡើង។ នេះជាពាក្យសន្យាយ៉ាងម៉ឺងម៉ាត់និងឧឡារិករបស់ប្រទេសចិនចំពោះពិភពលោក ។ បួនឆ្នាំកន្លងមកនេះ ការកសាងនិងអភិវឌ្ឍកំពង់ផែ ពាណិជ្ជកម្មសេរីហៃណាន បានក្លាយទៅជាគំរូមួយ ដែលប្រទេសចិនគោរពពាក្យសន្យា ។
ពេលថ្មីៗនេះ លោកXiJinping ប្រធានរដ្ឋចិន ដែលបានចុះទៅត្រួតពិនិត្យការងារ នៅខេត្តហៃណាន ប្រទេសចិន បានមកដល់តំបន់អភិវឌ្ឍន៍សេដ្ឋកិច្ចYang Pu ដើម្បីយល់ដឹងពីសភាពការណ៍ ដូចជាការវិវឌ្ឍរីកចំរើន នៃតំបន់អភិវឌ្ឍន៍សេដ្ឋកិច្ច Yang Pu និងការកសាងកំពង់ផែពាណិជ្ជកម្មសេរី ដែលប្រកបដោយលក្ខណៈពិសេស ប្រទេសចិនជាដើម។ ថ្ងៃដដែល តាមទិន្នន័យដែលអគ្គនាយកដ្ឋានគយចិន បានប្រកាសបង្ហាញអោយឃើញថា ទំហំពាណិជ្ជកម្មសរុបខាងការនាំចេញនាំចូល របស់ខេត្តហៃណាន បានកើនឡើងពី៧០២៨០លានយាន់ប្រាក់ចិន នៅឆ្នាំ២០១៧ ដល់១៤៧៦៨០លានយាន់ប្រាក់ចិន នៅឆ្នាំ២០២១ គិតជាមធ្យមក្នុងមួយឆ្នាំៗបានកើនឡើង២០.៤ភាគរយ ល្បឿនកំណើនប្រចាំឆ្នាំជាមធ្យម លឿនជាងទូទាំងប្រទេសចិន ១១.៥ភាគរយ ដែលកាន់លំដាប់ថ្នាក់ទី២ ។ នេះជាភស្តុតាង នៃភាពរស់រវើស នៃកំពង់ផែពាណិជ្ជកម្មសេរីហៃណាន ។
នៅថ្ងៃទី១៣ខែមេសាឆ្នាំ២០១៨ កំពង់ផែពាណិជ្ជកម្មសេរី ដ៏មានលក្ខណៈពិសេសប្រទេសចិន បានបង្កើតឡើងនៅហៃណាន។ បួនឆ្នាំកន្លងមកនេះ ក្រោមគោលនយោបាយរួចពន្ធ របស់កំពង់ផែពាណិជ្ជកម្មសេរីហៃណាន ទំហំសរុបខាងការនាំចូល លើសពី៧ពាន់លានយាន់ប្រាក់ចិន ល្បឿកំណើនប្រចាំឆ្នាំជាមធ្យម នៃការប្រើសប្រាស់ទុនបរទេសជាក់ស្តែង គឺ៧៩.៤ភាគរយ ហើយបានអនុវត្តគោលនយោបាយ នៃកំពង់ផែពាណិជ្ជកម្មសេរី ជាង១រយ៥០ប្រការ សមិទ្ធផលកសាងជាក់ស្តែងទាំងនេះ ជាសាក្សីនៃការប្តេជ្ញាចិត្តបើកចំហកាន់តែទូលំទូលាយ របស់ប្រទេសចិន និងការខិតខំទទួលផលឈ្នះៗ ជាមួយពិភពលោក ។
ដល់ឆ្នាំ២០២៥ នឹងបង្កើតជាជំហានដំបូងនូវប្រព័ន្ធគោលនយោបាយ កំពង់ផែពាណិជ្ជកម្មសេរី ដែលមានកិច្ចសម្រួល និងសេរីភាពនៃពាណិជ្ជកម្ម និងកិច្ចសម្រួលនិងសេរីភាពនៃការ វិនិយោគជាចំណុចសំខាន់ ។ ដល់ឆ្នាំ២០៣៥ ប្រព័ន្ធគោលនយោបាយនិងទម្រង់ដំណើរការនៃកំពង់ផែពាណិជ្ជកម្មសេរី កាន់តែមានភាពចាស់ទុំ។ ដល់ពាក់កណ្តាលសតវត្សរ៍នេះ នឹងកសាងកំពង់ផែពាណិជ្ជកម្មសេរីកំរិតខ្ពស់ ដែលមានកម្លាំងឥទ្ធិពលអន្តរជាតិខ្លាំងបង្គួរ ដោយគ្រប់ជ្រុងជ្រោយ នេះជាផែនទីបង្ហាញផ្លូវ ក្នុងការកសាងកំពង់ផែពាណិជ្ជកម្មសេរីហៃណានដែលគូរប្លង់យ៉ាងច្បាស់លាស់ ។
ជាការពិត ពិភពលោកទទួលបានអត្ថប្រយោជន៍ ពីក្នុងការកសាងកំពង់ផែពាណិជ្ជកម្មសេរីហៃណាន ក្នុងបួនឆ្នាំកន្លងមកនេះហើយ។ ឧទាហរណ៍ ដូចជាគោលនយោបាយរួចពន្ធ ក៏បានធ្វើអោយសហគ្រាស ជាច្រើនទទួលបានផលប្រយោជន៍ផងដែរ ។
រហតូដល់ចុងខែមីនាឆ្នាំ២០២២ ក្រោយគោលនយោបាយរួចពន្ធ របស់កំពង់ផែពាណិជ្ជកម្មសេរីហៃណាន ទំហំសរុបខាងការនាំចូលបានលើសពី៧ពាន់លានយាន់ប្រាក់ចិន ពាក់ព័ន្ធដល់ផលិតផលគ្រប់ប្រភេទ ដូចជាទូក ឡាន យន្តហោះនិងគ្រឿងបរិក្ខារផលិតកម្មជាដើម។
ស្របពេលកិច្ចព្រមព្រៀង ស្តីពីទំនាក់ទំនងភាពជាដៃគូសេដ្ឋកិច្ច គ្រប់ជ្រុងជ្រោយក្នុងតំបន់（RCEP）ចូលជាធរមាននៅថ្ងៃទី១ខែមករាឆ្នាំ២០២២ កំពង់ផែពាណិជ្ជកម្មសេរីហៃណាន បានទទួលឳកាសអភិវឌ្ឍន៍ថ្មី។ អាចព្យាករណ៍បានថា ពីខេត្តហៃណានដល់ទូទាំងប្រទេសចិន ការបើកចំហជុំថ្មីមួយ ដែលមានកំរិតកាន់តែខ្ពស់ និងធ្វើអោយពិភពលោកចែករំលែក ឳកាសប្រទេសចិនកាន់តែច្រើន ក៏ដូចជាបំពេញបន្ថែមកម្លាំងចលករជាបន្ទាន់ ដល់ការងើបឡើងវិញនៃសេដ្ឋកិច្ចពិភពលោកផងដែរ ៕
