បរទេស៖ ទីប្រឹក្សាសន្តិសុខជាតិ របស់សេតវិមាន លោក Jake Sullivan បាននិយាយកាលពីថ្ងៃព្រហស្បតិ៍ថា សហរដ្ឋអាមេរិក នឹងចាត់វិធានការគ្រប់ជំហាន ដើម្បីធានាថា ប្រទេសចិន នឹងមិនឈ្លានពានកោះតៃវ៉ាន់។
យោងតាមសារព័ត៌មាន RT ចេញផ្សាយកាលពីថ្ងៃទី១៤ ខែមេសា ឆ្នាំ២០២២ បានឱ្យដឹងថា
ថ្លែងនៅក្នុងសន្និសីទក្លឹបសេដ្ឋកិច្ច ក្នុងទីក្រុងវ៉ាស៊ីនតោន លោក Sullivan បានស្នើថា រដ្ឋាភិបាលទីក្រុងប៉េកាំងកំពុង “មើលដោយប្រុងប្រយ័ត្ន” នៅពេលនេះ ចំពោះព្រឹត្តិការណ៍នៅអ៊ុយក្រែន បន្ទាប់ពីការចាប់ផ្តើមការវាយលុកយោធា របស់រុស្ស៊ីកាលពីខែកុម្ភៈ “ដើម្បីរៀនមេរៀនធំ ៗ រួមទាំងទាក់ទងនឹងកោះតៃវ៉ាន់” ។
ដោយសង្កត់ធ្ងន់ថា “ស្ថានភាពជាមួយអ៊ុយក្រែន និងស្ថានភាពជាមួយកោះតៃវ៉ាន់មិនដូចគ្នាទេ” ទោះបីជាយ៉ាងណាក៏ដោយ លោក Sullivan បានបញ្ជាក់ថា ក្នុងរយៈពេលប៉ុន្មានសប្តាហ៍ចុងក្រោយនេះ មន្ត្រីអាមេរិក បានកំពុងប្រាប់សម្ព័ន្ធមិត្ត និងដៃគូរបស់ខ្លួនថា “រឿងបែបនេះអាចកើតឡើង នៅអឺរ៉ុប ហើយ រឿងបែបនេះ ក៏អាចកើតឡើងនៅឥណ្ឌូប៉ាស៊ីហ្វិកដែរ»។
នៅពេលសួរថា តើរដ្ឋាភិបាលអាមេរិក នឹងឈរនៅទីណា ប្រសិនបើចិនឈ្លានពានកោះតៃវ៉ាន់នោះ លោក Sullivan បានឆ្លើយតបថា “គោលនយោបាយរដ្ឋាភិបាលផ្លូវការ របស់យើង គឺយើងនឹងចាត់វិធានការ គ្រប់ជំហានដែលយើងអាចធ្វើបាន ដើម្បីធានាថាវាមិនកើតឡើង” ៕ ប្រែសម្រួលៈ ណៃ តុលា
