ថ្ងៃទី ២១ ខែ មេសា លោក Xi Jinping ប្រធានរដ្ឋចិនបានថ្លែងសន្ទរកថាគន្លឹះដែលមានចំណងជើងថា《ចាប់ដៃគ្នាដើម្បីប្រឈមមុខនឹងបញ្ហាប្រឈមនិងសហការគ្នាដើម្បីកសាងអនាគត》ក្នុងសន្និសីទប្រចាំឆ្នាំ ២០២២ នៃវេទិកា Boao សម្រាប់អាស៊ី ។ លោកបានគូសបញ្ជាក់ថា ឱ្យតែអាស៊ីល្អប្រសើរ ទើបពិភពលោកអាចកាន់តែល្អប្រសើរ ។ តើអនាគតអាស៊ីនឹងទៅជាយ៉ាងណា ? លោក Xi Jinping បានលើកឡើងពីពាក្យគន្លឹះទាំងនេះ ។
ពាក្យគន្លឹះទី ១ ៖ អច្ឆរិយៈ
ក្នុងរយៈពេលប៉ុន្មានទស្សវត្សន៍កន្លងមកនេះ ស្ថានការណ៍តំបន់អាស៊ីបានរក្សាស្ថិរភាពជាទូទៅ កំណើនសេដ្ឋកិច្ចប្រកបដោយចីរភាពនិងឆាប់រហ័ស ហើយសម្រេចបាន”អច្ឆរិយៈនៅអាស៊ី”។
ឱ្យតែអាស៊ីល្អប្រសើរ ទើបពិភពលោកអាចកាន់តែល្អប្រសើរ។ យើងត្រូវបន្តអភិវឌ្ឍនិងកសាងអាស៊ីឱ្យបានល្អ បង្ហាញពីភាពធន់ ប្រាជ្ញានិងភាពរឹងមាំរបស់អាស៊ី ហើយបង្កើតជាយុថ្កានៃសន្តិភាពនិងស្ថិរភាពពិភពលោក ប្រភពសន្ទុះនៃកំណើននិងកម្ពស់ថ្មីនៃកិច្ចសហប្រតិបត្តិការ ។
ពាក្យគន្លឹះទី ២ ៖ ការអត់ឱន
រួមគ្នាជំរុញសាមគ្គីភាពនៅអាស៊ី ប្រើប្រាស់ការសន្ទនានិងកិច្ចសហប្រតិបត្តិការជំនួសល្បែងផលបូកសូន្យ ប្រើប្រាស់បើកចំហនិងបរិយាប័ន្នជំនួសការបិទជិតនិងភាពផ្តាច់មុខ ហើយប្រើប្រាស់ការផ្លាស់ប្តូរនិងការរៀនសូត្រទៅវិញទៅមកជំនួសការយកខ្លួនឯងជាធំ នេះជាអ្វីដែលអាស៊ីគួរតែមាន ។
ពាក្យគន្លឹះទី ៣៖នាវាយក្ស
ប្រទេសនានាលើពិភពលោកបានជិះក្នុងនាវាយក្សមួយនិងរួមវាសនាតែមួយ ប្រសិនបើឆ្លងកាត់សមុទ្រដែលមានព្យុះរលកបោកបក់និងឆ្ពោះទៅកាន់អនាគតដ៏ភ្លឺស្វាង ចាំបាច់ត្រូវរួមសុករួមទុក្ខ រាល់ការប៉ុនប៉ងចង់ទម្លាក់នរណាទៅក្នុងសមុទ្រ គឺមិនអាចទទួលយកបានទេ៕
ពាក្យគន្លឹះទី ៤ ៖ម៉ាស៊ីន
សហគមន៍អន្តរជាតិដែលអភិវឌ្ឍមកដល់បច្ចុប្បន្នបានក្លាយទៅជាម៉ាស៊ីនមួយប្រកបដោយភាពស្មុគស្មាញនិងប្រណីត ការរុះរើគ្រឿងបន្លាស់ណាមួយ អាចធ្វើឱ្យម៉ាស៊ីនទាំងមូលដំណើរការដោយសភាពពិបាកធ្ងន់ធ្ងរ អ្នកដែលត្រូវបានគេរុះរើនឹងខូចខាត ហើយអ្នកដែលរុះរើក៏នឹងខូចខាតដូចគ្នាដែរ៕
ពាក្យគន្លឹះទី ៥ ៖ វ៉ាក់សាំង
ត្រូវប្រកាន់ខ្ជាប់ថាវ៉ាក់សាំងការពារជំងឺកូវីដ១៩ ជាផលិតផលសាធារណៈសម្រាប់ពិភពលោក ធានាជាក់លាក់ថាប្រទេសកំពុងអភិវឌ្ឍន៍អាចទទួលបានរកទិញបានវ៉ាក់សាំង។ ប្រទេសចិនបានផ្តល់វ៉ាក់សាំងចំនួនលើសពី ២១០០ លានដូសដល់ប្រទេសនិងអង្គការអន្តរជាតិចំនួនជាង ១២០ ។ មិនថាការផ្គត់ផ្គង់វ៉ាក់សាំងទៅក្រៅប្រទេសឬផលិតវ៉ាក់សាំងនៅក្រៅប្រទេស ប្រទេសចិននិយាយម៉ាត់ណាម៉ាត់ហ្នឹង ហើយធ្វើរហូតដល់ទទួលបានផ្លែផ្កា។ ប្រទេសចិននឹងបន្តផ្តល់ជំនួយជាវ៉ាក់សាំងចំនួន ៦០០ លានដូស និង ១៥០ លានដូសទៅឱ្យទ្វីបអាហ្វ្រិកនិងអាស៊ានដោយឡែកពីគ្នា ដើម្បីរួមចំណែកបង្រួមគម្លាតក្នុងការចែកចាយវ៉ាក់សាំង។
ពាក្យគន្លឹះទី ៦ ៖ មហាគ្រួសារ
មិនថាប្រទេសធំឬតូច ខ្លាំងឬខ្សោយ នៅក្នុងតំបន់ឬក្រៅតំបន់ គួរបន្ថែមរឿងរ៉ាវល្អៗដល់អាស៊ីតែមិនមែនបង្ករឿងឱ្យច្របូកច្របល់ឡើយ គួររួមគ្នាអភិវឌ្ឍដោយសន្តិភាព សហប្រតិបត្តិការនិងឈ្នះ-ឈ្នះ គួរកសាងមហាគ្រួសារអាស៊ីដ៏សាមគ្គីភាពនិងរីកចម្រើន៕
