ស៊ីដនី (AFP) – រដ្ឋមន្ត្រីក្រសួងសន្តិសុខរបស់អូស្ត្រាលី បាននិយាយកាលពីថ្ងៃពុធថា ប្រទេសចិន ទំនងជានឹងដាក់កងទ័ព នៅក្នុងប្រជុំកោះ Solomon បន្ទាប់ពីបានចុះហត្ថលេខា លើកិច្ចព្រមព្រៀងសន្តិសុខដ៏ចម្រូងចម្រាស ជាមួយប្រទេសប៉ាស៊ីហ្វិកមួយនេះ។
កិច្ចព្រមព្រៀងនេះ ត្រូវបានប្រកាសដោយទីក្រុងប៉េកាំង កាលពីថ្ងៃអង្គារសប្តាហ៍មុន ត្រឹមតែប៉ុន្មានសប្តាហ៍ បន្ទាប់ពីសេចក្តីព្រាងច្បាប់មួយ បានលេចធ្លាយ នៅលើប្រព័ន្ធផ្សព្វផ្សាយសង្គម និងបង្កឱ្យមានការព្រួយបារម្ភថា វាអាចបើកទ្វារ ទៅរកវត្តមានយោធាចិន នៅក្នុងប៉ាស៊ីហ្វិកខាងត្បូង។
នៅពេលសួរថាតើវាមានភាពប្រាកដប្រជាប៉ុណ្ណា ដែលចិននឹងស្នើសុំដាក់កងទ័ពនៅកោះ Solomon ក្នុងឆ្នាំបន្ទាប់ រដ្ឋមន្ត្រីក្រសួងមហាផ្ទៃ Karen Andrews បានប្រាប់វិទ្យុ 4BC ថាវា “ទំនងណាស់” ។
លោកស្រីបានបន្តថា៖ «វាទំនងជានោះនឹងជាផ្លូវដែលចិននឹងធ្វើនៅក្នុងតំបន់ប៉ាស៊ីហ្វិក»។
នាយករដ្ឋមន្ត្រីកោះ Solomon លោក Manasseh Sogavare បាននិយាយម្តងហើយម្តងទៀតថា នឹងមិនមានមូលដ្ឋានយោធាចិន ត្រូវបានសាងសង់នៅក្នុងប្រទេសរបស់លោក ក្រោមកិច្ចព្រមព្រៀងសន្តិសុខ ប៉ុន្តែមិនបានផ្សព្វផ្សាយជាសាធារណៈ នូវកំណែចុងក្រោយនៃកិច្ចព្រមព្រៀងនេះ។
សេចក្តីព្រាងដែលបានលេចធ្លាយ មានបទប្បញ្ញត្តិដែលអនុញ្ញាត ឱ្យមានសន្តិសុខ និងការដាក់ពង្រាយកងទ័ពជើងទឹក របស់ចិន ទៅកាន់កោះ Solomon រួមទាំងភាសាដែលបញ្ជាក់ថា “កងកម្លាំងរបស់ចិន” នឹងត្រូវបានផ្តល់សិទ្ធិអំណាច ដើម្បីការពារ “សុវត្ថិភាពរបស់បុគ្គលិកចិន” និង “គម្រោងសំខាន់ៗ” ។
ប្រែសម្រួលដោយ៖ សយ សុភា
