បរទេស៖ ទីភ្នាក់ងារចិនស៊ិនហួ ចេញផ្សាយនៅថ្ងៃចន្ទនេះបានឲ្យដឹងថា ប្រធានាធិបតីអាមេរិកលោក Joe Biden បានធ្វើដំណើរមកដល់ប្រទេសជប៉ុន កាលពីថ្ងៃអាទិត្យម្សិលមិញភ្លាម ក្រុមបាតុករជនជាតិជប៉ុនប្រមាណជា ៧៥០នាក់ បាននាំគ្នាប្រមូលផ្តុំគ្នានៅតាមផ្លូវ ដើម្បីប្រឆាំងទៅនឹងផែនការ នៃកិច្ចប្រជុំប្រទេសទាំង៤ សម្រាប់កិច្ចការងារសន្តិសុខឬ The Quad។
កិច្ចប្រជុំជាច្រើនត្រូវបាន ត្រៀមរៀបចំផែនការរួចហើយ នៅក្នុងដំណើរទស្សនកិច្ចរយៈពេល ៣ថ្ងៃ ចំពោះប្រធានាធិបតីអាមេរិករូបនេះនៅក្នុងប្រទេសជប៉ុន បន្ទាប់ពីដំណើរទស្សនកិច្ច នៅកូរ៉េខាងត្បូងដែលមានរួមទាំងកិច្ចប្រជុំ ៤ភាគីដូចជាជប៉ុន អូស្ត្រាលី ឥណ្ឌា និងអាមេរិក ព្រមទាំងកិច្ចប្រជុំ Indo-Pacific Economic Framework (IPEF)។
ទោះបីជាយ់ាងណាក្តីសាធារណជន នៅក្នុងប្រទេសជប៉ុនបានពិចារណាថា អត្ថប្រយោជន៍នៃកិច្ចប្រជុំ IPEF ហាក់ដូចជាមិនសូវមានអត្ថប្រយោជន៍ខ្លាំង ចំពោះជប៉ុនឡើយពីព្រោះថា ក្នុងមតិកានៃកិច្ចប្រជុំនោះគឺពុំមានការបញ្ចូល ការងារគិតគូរពីការបញ្ចុះតម្លៃពន្ធនាំចូល ដែលនឹងផ្តល់ប្រយោជន៍សម្រាប់ សេដ្ឋកិច្ចរបស់ជប៉ុននោះឡើយ ៕
ប្រែសម្រួល៖ ស៊ុន លី
