បាងកក៖ ឧបនាយករដ្ឋមន្ត្រី និងជារដ្ឋមន្ត្រីក្រសួងពាណិជ្ជកម្មថៃ លោក Jurin Laksanavisit បានអំពាវនាវឱ្យមានការពង្រឹង កិច្ចខិតខំប្រឹងប្រែងពីសេដ្ឋកិច្ច នៃកិច្ចសហប្រតិបត្តិការសេដ្ឋកិច្ចអាស៊ីប៉ាស៊ីហ្វិក (APEC) ដើម្បីឆ្លើយតបទៅនឹង វិបត្តិនាពេលអនាគត និងសម្រេចបាននូវកំណើន សេដ្ឋកិច្ចកាន់តែប្រសើរ និងរួមបញ្ចូលកាន់តែច្រើននៅក្នុងតំបន់។
ក្នុងពេលថ្លែងសុន្ទរកថាទៅកាន់រដ្ឋមន្ត្រី APEC ដែលទទួលខុសត្រូវ ចំពោះកិច្ចប្រជុំពាណិជ្ជកម្មនៅថ្ងៃសៅរ៍ និងថ្ងៃអាទិត្យ លោក Jurin បានឲ្យដឹងថា “ខ្ញុំសង្ឃឹមយ៉ាងមុតមាំថា លទ្ធផលនៃកិច្ចប្រជុំនេះនឹងរួមបញ្ចូល នូវគោលជំហរគោលនយោបាយដ៏រឹងមាំមួយ ទាក់ទងនឹងការងើបឡើងវិញនៃសេដ្ឋកិច្ច ក្នុងតំបន់បន្ទាប់ពីជំងឺរាតត្បាតកូវីដ-១៩ ពីកន្លែងដែលយើងគួរ ងើបឡើងខ្លាំងជាងពេលណាៗទាំងអស់ ដើម្បីទប់ទល់នឹងវិបត្តិនាពេលខាងមុខ” ។
ប្រទេសថៃ គឺជាម្ចាស់ផ្ទះនៃ APEC 2022។ លោក Jurin បានរំលេចប្រធានបទរបស់ប្រទេសថៃគឺ “Open. Connect. Balance” និងបានជំរុញឱ្យបណ្តាខឿនសេដ្ឋកិច្ច ជាសមាជិកជំរុញការងាររបស់ APEC ក្នុងការធ្វើសមាហរណកម្ម សេដ្ឋកិច្ចឱ្យកាន់តែស៊ីជម្រៅ និងការប្រមូលផ្តុំវឌ្ឍនភាពនៃ តំបន់ពាណិជ្ជកម្មសេរីនៃអាស៊ីប៉ាស៊ីហ្វិក (FTAAP)។
លោកក៏បានរំលឹកឡើងវិញ ពីសារៈសំខាន់នៃការបន្តការធ្វើដំណើរ ឆ្លងព្រំដែនប្រកបដោយសុវត្ថិភាព និងងាយស្រួល និងការលើកកម្ពស់ការតភ្ជាប់ បណ្តាញឌីជីថល និងការផ្គត់ផ្គង់ ខណៈពេលដែលគិតគូរពីការការពារបរិស្ថាន និងការជំរុញសន្តិសុខស្បៀង និងកសិកម្ម ដើម្បីធានាសុខុមាលភាព របស់ប្រជាជនក្នុងតំបន់។
កិច្ចប្រជុំនេះ ដោយមានអ្នកចូលរួមតាមអ៊ីនធឺណិត ឬក្រៅបណ្តាញពីបណ្តាប្រទេសសេដ្ឋកិច្ច APEC បានមើលឃើញថា សេដ្ឋកិច្ចសមាជិកបានរៀបរាប់លម្អិត អំពីទស្សនៈរបស់ពួកគេអំពីអនាគត នៃគោលនយោបាយពាណិជ្ជកម្ម ជាពិសេសសម្រាប់ការរស់ឡើងវិញ និងការពង្រឹងសមាហរណកម្មសេដ្ឋកិច្ចក្នុងតំបន់ និងគាំទ្រដល់ប្រព័ន្ធពាណិជ្ជកម្មពហុភាគី ៕
ប្រែសម្រួល ឈូក បូរ៉ា
