ប៉េកាំង៖ អ្នកនាំពាក្យក្រសួងការបរទេសចិនលោក Zhao Lijian កាលពីថ្ងៃពុធបានជំរុញឱ្យសហរដ្ឋអាមេរិក អនុវត្តយ៉ាងពិតប្រាកដនូវគោលការណ៍ នៃការគោរពគ្នាទៅវិញទៅមក ការរួមរស់ដោយសន្តិភាព និងកិច្ចសហប្រតិបត្តិការឈ្នះ-ឈ្នះ។
នៅក្នុងសុន្ទរកថានាពេលថ្មីៗនេះ រដ្ឋមន្ត្រីការបរទេសសហរដ្ឋអាមេរិក លោក Antony Blinken បានកំណត់លក្ខណៈនៃ យុទ្ធសាស្ត្រចិនរបស់រដ្ឋបាលលោក Biden ថាជាការ “វិនិយោគ តម្រឹម និងប្រកួតប្រជែង” ។
ជាការឆ្លើយតប លោក Zhao បានប្រាប់សន្និសីទសារព័ត៌មានប្រចាំថ្ងៃថា ប្រទេសចិនតែងតែជឿថា ការកសាងពិភពលោកនៃការតភ្ជាប់ ភាពចម្រុះ សមាហរណកម្ម សន្តិសុខ និងផលប្រយោជន៍រួម គឺជាទំនួលខុសត្រូវ និងកាតព្វកិច្ចដែលទាំងចិន និងសហរដ្ឋអាមេរិកត្រូវតែអនុវត្ត។
លោកបានលើកឡើងថា ប្រទេសចិនរីករាយដែលបាន ឃើញសហរដ្ឋអាមេរិកសម្រេចបាន នូវការអភិវឌ្ឍន៍តាមរយៈ ការបណ្តាក់ទុនស្របច្បាប់ ប៉ុន្តែសហរដ្ឋអាមេរិកមិនគួរធ្វើឱ្យប្រទេសចិនជា “សត្រូវស្រមើលស្រមៃ” នោះទេ។
លោក Zhao បានបន្ថែមថា របៀបដែលសហរដ្ឋអាមេរិកធ្វើឱ្យ ប្រសើរឡើងនូវការបង្កើតថ្មី និងសមត្ថភាពប្រកួតប្រជែងរបស់ខ្លួន គឺអាស្រ័យលើសហរដ្ឋអាមេរិក ប៉ុន្តែវាមិនគួរបង្រ្កាប និងទប់ស្កាត់ប្រទេសចិន ជ្រៀតជ្រែកកិច្ចការផ្ទៃក្នុងរបស់ចិន និងប៉ះពាល់ដល់ផលប្រយោជន៍ របស់ប្រទេសចិននោះទេ ៕
ប្រែសម្រួល ឈូក បូរ៉ា
