គៀវ៖ ទូរទស្សន៍សិង្ហបុរី Channel News Asia បានផ្សព្វផ្សាយព័ត៌មាននៅថ្ងៃទី៧ ខែមិថុនា ឆ្នាំ២០២២ថា លោក Volodymyr Zelenskyy ប្រធានាធិបតីអ៊ុយក្រែន បានថ្លែងកាលពីថ្ងៃចន្ទថា ចក្រភពអង់គ្លេស បាននិងកំពុងផ្តល់សព្វាវុធដែលទីក្រុង គៀវត្រូវការ ដើម្បីប្រយុទ្ធប្រឆាំង នឹងសង្គ្រាមជាមួយរុស្ស៊ី ហើយបានថ្លែងអំណរគុណ ដល់នាយករដ្ឋមន្ត្រី Boris Johnson សម្រាប់ការយល់ដឹងយ៉ាងច្បាស់ អំពីតម្រូវការមួយនេះ ។
ចក្រភពអង់គ្លេសបានឲ្យដឹង កាលពីថ្ងៃចន្ទថា ក្នុងការសម្របសម្រួល ជាមួយសហរដ្ឋអាមេរិក ខ្លួននឹងផ្គត់ផ្គង់អ៊ុយក្រែន ជាមួយនឹងប្រព័ន្ធរ៉ុក្កែតបាញ់ច្រើន ដែលអាចវាយប្រហារគោលដៅ បានចម្ងាយរហូតដល់៨០គីឡូម៉ែត្រ ដែលជាផ្នែកនៃជំនួយយោធាថ្មីរបស់ចក្រភពអង់គ្លេស សម្រាប់ទីក្រុង គៀវ ។
លោក Zelenskyy បានថ្លែងនៅក្នុងសុន្ទរកថា វីដេអូនាពេលយប់របស់គាត់ថា “ខ្ញុំដឹងគុណ ចំពោះនាយករដ្ឋមន្រ្តី Boris Johnson សម្រាប់ការយល់ដឹងយ៉ាងច្បាស់ នៃការទាមទារ និងការត្រៀមខ្លួនរបស់យើងក្នុង ការផ្តល់ឱ្យអ៊ុយក្រែន នូវអាវុធយ៉ាងពិតប្រាកដ ដែលអ៊ុយក្រែនត្រូវការ ដើម្បីការពារជីវិតប្រជាជនរបស់យើង” ។
កាលពីថ្ងៃចន្ទ កងទ័ពអ៊ុយក្រែន និងរុស្ស៊ី បានប្រយុទ្ធគ្នាតាមដងផ្លូវ ដើម្បីគ្រប់គ្រងទីក្រុង ឧស្សាហកម្ម Sievierodonetsk ក្នុងសមរភូមិដ៏សំខាន់ នៃការវាយលុករបស់វិមានក្រឹមឡាំង នៅតំបន់ Donbas ភាគខាងកើតនៃប្រទេសអ៊ុយក្រែន ។
សូមបញ្ជាក់ថា លោក Zelenskyy និងលោក Johnson បានជួបសន្ទនាគ្នា តាមទូរស័ព្ទដែលក្នុងនោះ លោក Zelenskyy បានថ្លែងនៅមុននេះថា អ្នកទាំង២កំពុង “ស្វែងរកមធ្យោបាយដើម្បីជៀស វាងវិបត្តិស្បៀងអាហារ និងការបិទច្រក (របស់អ៊ុយក្រែន)” ដោយសំដៅទៅលើការ បិទនាវារបស់រុស្ស៊ី នៅអ៊ុយក្រែន ដែលបានធ្វើឱ្យប្រទេសនេះ មិនអាចនាំចេញបានច្រើននូវកសិផលរបស់ខ្លួន ៕ប្រែសម្រួលដោយ៖ ម៉ៅ បុប្ផាមករា
