រដ្ឋមន្ត្រីបរិស្ថាន សាធារណរដ្ឋដូមីនីក ត្រូវមិត្តភក្តិស្និតស្នាល បាញ់សម្លាប់ នៅក្នុងការិយាល័យ ធ្វើការ

បរទេស៖ ការិយាល័យប្រធានាធិបតី Luis Abinader បានរាយការណ៍កាលពីថ្ងៃចន្ទថា រដ្ឋមន្ត្រីបរិស្ថាន នៃសាធារណរដ្ឋដូមីនីកែន លោក Orlando Jorge Mera ត្រូវបានបាញ់សម្លាប់ នៅក្នុងការិយាល័យរបស់លោក ដោយលោក Miguel Cruz ដែលជាមិត្តជិតស្និទ្ធ ដែលគាត់បានស្គាល់ តាំងពីកុមារភាព។

យោងតាមសារព័ត៌មាន RT ចេញផ្សាយនៅថ្ងៃទី៦ ខែមិថុនា ឆ្នាំ២០២២ បានឱ្យដឹងថា អ្នកធ្វើការនៅក្រសួងបានប្រាប់អ្នកយកព័ត៌មានថា ពួកគេបានឮយ៉ាងហោចណាស់សំឡេងកាំភ្លើង ៧គ្រាប់ ចេញពីការិយាល័យ។ ប៉ូលិសបានហាមមិនឲ្យចូលទៅក្នុងអគារដែលជាស្នាក់ការរបស់ក្រសួងទេសចរណ៍ផងដែរ។ ជនសង្ស័យឈ្មោះ Cruz ត្រូវបានគេរាយការណ៍ថាត្រូវបានចាប់ខ្លួននៅព្រះវិហារក្បែរនោះ។ មិនទាន់មានមូលហេតុនៃការសម្លាប់នេះនៅឡើយទេ ។

ការិយាល័យប្រធានាធិបតី Luis Abinader បានផ្ញើការរំលែកទុក្ខរបស់គាត់ទៅកាន់គ្រួសាររបស់លោក Jorge នៅលើ Twitter ។ ក្រុមគ្រួសារជនរងគ្រោះក៏បានចេញសេចក្តីថ្លែងការណ៍ផងដែរ ដែលអានថា “គ្រួសាររបស់យើងអភ័យទោសដល់អ្នកដែលបានធ្វើរឿងនេះ” ដោយបន្ថែមថា “កេរ្តិ៍ដំណែលដ៏អស្ចារ្យបំផុតមួយរបស់ Orlando គឺមិនត្រូវមានកំហឹង” ៕

ប្រែសម្រួលៈ ណៃ តុលា