ព័ត៌មានអន្តរជាតិ

ចិន​ ជំរុញ​ឲ្យ​អាមេរិក ប្រគល់ទ្រព្យសម្បត្តិជាតិ របស់អាហ្វហ្គានីស្ថាន ឲ្យទៅប្រទេសនេះវិញ

ប៉េកាំង៖ អ្នកនាំពាក្យក្រសួងការបរទេសចិន លោក Zhao Lijian បានឲ្យដឹងថា សហរដ្ឋអាមេរិក គួរតែបញ្ឈប់ជាបន្ទាន់ នូវការចាប់ជនជាតិអាហ្វហ្គានីស្ថាន ហើយប្រគល់ទ្រព្យសម្បត្តិជាតិ របស់អាហ្វហ្គានីស្ថានវិញ ឱ្យបានឆាប់តាមដែលអាចធ្វើទៅបាន។

លោក Zhao បាន​ធ្វើ​ការ​កត់​សម្គាល់​ នៅ​ក្នុង​សន្និសីទ​កាសែត ​នៅ​ពេល​ឆ្លើយ​សំណួរ​ពាក់ព័ន្ធ នេះបើយោងតាមការចុះផ្សាយ របស់ទីភ្នាក់ងារសារព័ត៌មានចិនស៊ិនហួ។

ក្នុងរយៈពេលប៉ុន្មានថ្ងៃថ្មីៗនេះ យន្តហោះដឹកទំនិញ Y-20 របស់យោធាចិន  បានទៅដល់អាកាសយានដ្ឋានអន្តរជាតិទីក្រុងកាប៊ុល ដោយដឹកសម្ភារៈសង្គ្រោះគ្រោះមហន្តរាយ សម្រាប់ប្រជាជនអាហ្វហ្គានីស្ថានទៅជាមួយ។  

អ្នក​ប្រើ​អ៊ីនធឺណិត​មួយ​ចំនួន​បាន​ឲ្យដឹងថា នេះ​ផ្ទុយ​ស្រឡះ​ជាមួយ​នឹង​អ្វី​ ដែល​បាន​កើត​ឡើង ​នៅ​ព្រលាន​យន្តហោះ​តែ​មួយ​នេះ ​ក្នុង​ខែ​សីហា​ឆ្នាំ​មុន នៅ​ពេល​ដែល​មាន​ជនជាតិ​អាហ្វហ្គានីស្ថាន ​យ៉ាង​ហោច​ណាស់​ពីរ​នាក់​បាន​ស្លាប់ ​ដោយសារ​សហរដ្ឋ​អាមេរិក។  យន្តហោះដឹកទំនិញ C-17 ដែលបានហោះយ៉ាងលឿន។

ផ្ទាំងពាណិជ្ជកម្ម

លោក Zhao បានបន្ដថា “ខ្ញុំបានកត់សម្គាល់ឃើញអ្នកខ្លះនិយាយថា នៅអាកាសយានដ្ឋានតែមួយ យន្តហោះមួយបានបណ្តាលឱ្យបាត់បង់ជីវិត ខណៈមួយទៀត នាំមកនូវក្តីសង្ឃឹម បន្ទាប់ពីគ្រោះរញ្ជួយដីបានវាយប្រហារ ប្រទេសចិនបានធ្វើសកម្មភាព ក្នុងល្បឿនលឿនបំផុត ដើម្បីជួយអាហ្វហ្គានីស្ថាន ឱ្យអស់ពីសមត្ថភាព។ យើងបានផ្ដល់ជំនួយមនុស្សធម៌ សង្គ្រោះបន្ទាន់តម្លៃ ៥០លានយ័នភ្លាមៗ ដល់តំបន់រងគ្រោះដោយរញ្ជួយដី នៅអាហ្វហ្គានីស្ថាន”។

លោក Zhao បានបន្ថែមថា ប្រទេសចិន គឺជាប្រទេសដំបូងគេ ដែលបានផ្តល់ជំនួយដ៏ធំបំផុត និងជាក់ស្តែងបំផុតដល់អាហ្វហ្គានីស្ថាន។  “គិតត្រឹមថ្ងៃទី២៩ ខែមិថុនា ការផ្គត់ផ្គង់ជំនួយចំនួនបី បានមកដល់ប្រទេសអាហ្វហ្គានីស្ថាន ហើយភាគីចិន កំពុងធ្វើការសម្របសម្រួលយ៉ាងជិតស្និទ្ធ ជាមួយរដ្ឋាភិបាលបណ្តោះអាសន្ន នៃប្រទេសអាហ្វហ្គានីស្ថាន ដើម្បីធានាថា ការផ្គត់ផ្គង់ជំនួយនឹងត្រូវបានប្រគល់ជូនប្រជាពលរដ្ឋ ដែលរងផលប៉ះពាល់ឱ្យបានឆាប់ តាមដែលអាចធ្វើទៅបាន ដើម្បីជួយពួកគេ”។

លោក Zhao បានបន្ថែមទៀតថា “សហរដ្ឋអាមេរិក គឺជាប្រទេសដែលបានចាប់ផ្តើម គ្រោះមហន្តរាយមនុស្សធម៌ ដែលកំពុងបន្តនៅក្នុងប្រទេសអាហ្វហ្គានីស្ថាន ហើយវាជាការទទួលខុសត្រូវ ភ្លាមៗចំពោះសង្រ្គាមដ៏ក្តៅគគុក និងជម្លោះ ភាពក្រីក្រ ភាពអត់ឃ្លាន និងការរងទុក្ខរបស់ប្រជាជន នៅក្នុងប្រទេសនោះអស់រយៈពេលជាច្រើនឆ្នាំ”៕ ប្រែសម្រួល ឈូក បូរ៉ា

To Top