អ្នកការទូតកំពូលចិន អំពាវនាវឱ្យមានពហុភាគីនិយម កិច្ចសហប្រតិបត្តិការឈ្នះ-ឈ្នះ នៅក្នុងកិច្ចប្រជុំ G20

ប៉េកាំង៖ ទីប្រឹក្សារដ្ឋ និងជារដ្ឋមន្ត្រីការបរទេសចិន លោក Wang Yi កាលពីថ្ងៃសុក្រ បានអំពាវនាវឱ្យប្រកាន់ខ្ជាប់ នូវលទ្ធិពហុភាគីពិត ធ្វើកិច្ចសហប្រតិបត្តិការឈ្នះឈ្នះ និងសម្រេចបាននូវបរិយាប័ន្ន និងការតភ្ជាប់ក្នុងក្របខ័ណ្ឌ នៃក្រុមប្រទេសទាំង២០ (G20)។

លោក Wang Yi បានធ្វើការកត់សម្គាល់ពេលថ្លែងសុន្ទរកថា ក្នុងកិច្ចប្រជុំរដ្ឋមន្ត្រីការបរទេស G20 ដែលធ្វើឡើងនៅកោះ Bali របស់ឥណ្ឌូនេស៊ី នេះបើយោងតាមការចុះផ្សាយ របស់ទីភ្នាក់ងារសារព័ត៌មានចិនស៊ិនហួ។

លោកបានមានប្រសាសន៍ថា សមាជិក G20 គួរតែជាដៃគូ ដែលមានការគោរពគ្នាទៅវិញទៅមក និងការពិគ្រោះយោបល់លើគោលជំហរស្មើគ្នា។ លោកបានលើកឡើងថា ពួកគេគួរតែជាដៃគូនៃ ការរួមរស់ដោយសន្តិភាព និងកិច្ចសហប្រតិបត្តិការឈ្នះ-ឈ្នះ ដោយបន្ថែមថាសមាជិក G20 ក៏គួរតែជាដៃគូសម្រាប់ការបើកចំហ រួមបញ្ចូល និងការតភ្ជាប់ផងដែរ។

លោកបានបន្ដថា សមាជិក G20 គួរតែពង្រឹងការសម្របសម្រួលរបស់ពួកគេ លើគោលនយោបាយម៉ាក្រូសេដ្ឋកិច្ច ដើម្បីជំរុញឱ្យមានការងើបឡើងវិញ ដោយរួមបញ្ចូល និងកំណើនសេដ្ឋកិច្ចពិភពលោក។

លោក បានបន្ថែមថា ពួកគេគួរតែរួមគ្នារក្សាស្ថិរភាព ខ្សែសង្វាក់ផ្គត់ផ្គង់អន្តរជាតិ ដើម្បីបន្ធូរបន្ថយសម្ពាធ អតិផរណាពិភពលោក ដោយអំពាវនាវឱ្យមានការជំរុញ ប្រព័ន្ធពាណិជ្ជកម្មពហុភាគី ដើម្បីជំរុញបរិយាកាសពាណិជ្ជកម្ម អន្តរជាតិបើកចំហ តម្លាភាព និងមិនរើសអើង។

លោកក៏បានជំរុញឱ្យសមាជិក G20 ផ្តល់អាទិភាពដល់ការអភិវឌ្ឍន៍ និងបង្កើនកិច្ចសហប្រតិបត្តិការ លើវិស័យកាត់បន្ថយភាពក្រីក្រ ការប្រយុទ្ធប្រឆាំងនឹងជំងឺកូវីដ-១៩ ហេដ្ឋារចនាសម្ព័ន្ធ និងការអភិវឌ្ឍន៍បៃតង៕

ប្រែសម្រួល ឈូក បូរ៉ា