ចិន ត្អូញត្អែរដាក់ជប៉ុន ក្រោយមានវត្តមាន អនុប្រធានាធិបតីកោះតៃវ៉ាន់ ចូលរួមក្នុងពិធីគោរព វិញ្ញាណក្ខន្តសព អតីតនាយករដ្ឋមន្ត្រី

ប៉េកាំង៖ ទូរទស្សន៍សិង្ហបុរី Channel News Asia បានផ្សព្វផ្សាយ នៅថ្ងៃទី១៣ ខែកក្កដា ឆ្នាំ២០២២ថា ក្រសួង ការបរទេសចិន បានឲ្យដឹង កាលពីថ្ងៃអង្គារថា ស្ថានទូតរបស់ខ្លួន នៅក្នុងប្រទេសជប៉ុន បានដាក់ “តំណាងយ៉ាងតឹងរឹង” ជាមួយរដ្ឋាភិបាលនៅទីនោះ ដោយបានលើកឡើង អំពីអនុប្រធានាធិបតីកោះតៃវ៉ាន់ លោក William Lai ដែលបានចូលរួមក្នុងពិធីបុណ្យ សពអតីតនាយករដ្ឋមន្ត្រីជប៉ុន ស៊ិនហ្ស៊ូ អាបេ (Shinzo Abe) ។

គួររំលឹកថា លោក Lai បានទៅបំពេញទស្សនកិច្ច នៅប្រទេសជប៉ុន ក្នុងអ្វីដែលមន្ត្រីជប៉ុន បានពិពណ៌នាថា ជាដំណើរទស្សនកិច្ចឯកជន ដើម្បីគោរពលោក ក្នុងនាមជាមិត្តរបស់លោក អាបេ ដែលជាទង្វើ ដែលតែងតែធ្វើឱ្យទីក្រុងប៉េកាំង ខកចិត្តដែលចាត់ទុកថា បានគ្រប់គ្រងកោះតៃវ៉ាន់ តាមបែបប្រជាធិបតេយ្យ ដែលជាទឹកដីរបស់ខ្លួន ដោយគ្មានសិទ្ធិក្នុង ការជាប់ពាក់ព័ន្ធរបស់រដ្ឋ ណាមួយឡើយ ។

អ្នកនាំពាក្យក្រសួងលោក Wang Wenbin បានលើកឡើងនៅក្នុងសន្និសីទ សារព័ត៌មានជាទៀង ទាត់នៅទីក្រុងប៉េកាំង បានឲ្យដឹងថា កោះតៃវ៉ាន់គឺជាផ្នែកមួយ របស់ប្រទេសចិន ហើយ “មិនមានអ្វីដែលគេហៅថា អនុប្រធានាធិបតីនោះទេ” ។

លោក Wang បានលើកឡើងថា “បន្ទាប់ពីការធ្វើឃាត អតីតនាយករដ្ឋមន្ត្រីជប៉ុន Abe អាជ្ញាធរកោះតៃវ៉ាន់ បានប្រើឱកាសដើម្បីចូលរួមក្នុង ឧបាយកលនយោបាយ” ។ “វាមិនអាចទៅរួចទេ គម្រោងបែបនេះ នឹងទទួលបានជោគជ័យ” ។

ទីភ្នាក់ងារសារព័ត៌មានកណ្តាល របស់កោះតៃវ៉ាន់ បានចុះផ្សាយថា លោក Lai គឺជាមន្ត្រីជាន់ខ្ពស់បំផុត ដែលបានទៅបំពេញទស្សនកិច្ច នៅប្រទេសជប៉ុន ចាប់តាំងពីទីក្រុងតូក្យូបានផ្តាច់ទំនាក់ទំនងជាផ្លូវការជាមួយក្រុងតៃប៉ិ ក្នុងឆ្នាំ១៩៧២ និងបានបង្រួបបង្រួមទំនាក់ទំនង ជាមួយទីក្រុងប៉េកាំងវិញ ៕
ប្រែសម្រួលដោយ៖ ម៉ៅ បុប្ផាមករា