បរទេស៖ អាជ្ញាធរក្នុងតំបន់បាននិយាយថា មនុស្សម្នាក់បានស្លាប់ និងបួននាក់ផ្សេងទៀតបានរងរបួស នៅក្នុងការបាញ់ប្រហារនៅបារ shisha នៅកណ្តាលទីក្រុងប៉ារីស ប្រទេសបារាំង កាលពីល្ងាចថ្ងៃចន្ទ។
យោងតាមសារព័ត៌មាន RT ចេញផ្សាយនៅថ្ងៃទី១៩ ខែកក្កដា ឆ្នាំ២០២២ បានឱ្យដឹងថា ឧបទ្ទវហេតុនេះបានកើតឡើងនៅតំបន់ទី១១ ដែលជាតំបន់ដែលមានប្រជាជន រស់នៅច្រើនបំផុត របស់រដ្ឋធានីបារាំង ដែលមានទីតាំងនៅច្រាំងខាងស្តាំ នៃទន្លេ Seine មិនឆ្ងាយពីវិមាន Place de la Bastille ។
តាមសេចក្តីរាយការណ៍ មានបុរសជាច្រើននាក់ បានលោតចេញពីរថយន្ត ហើយបានបាញ់ប្រហារទៅលើមនុស្ស ដែលកំពុងអង្គុយនៅខាងមុខ។
លោក Francois Vaughlin ប្រធានតំបន់ទី 11 បានបញ្ជាក់ពីការស្លាប់និងរបួសនៅលើ Twitter ដោយនិយាយថា មានអ្នកបាញ់ប្រហារចំនួន៣ នាក់ដែលពាក់ព័ន្ធ ម្នាក់ក្នុងចំណោមនោះត្រូវបានចាប់ខ្លួន ដោយអ្នកនៅក្បែរនោះ ហើយក្រោយមកត្រូវបានប៉ូលីសឃាត់ខ្លួន។
មន្ត្រីដដែលបន្តថា ម្នាក់ទៀតបានរងរបួសយ៉ាងធ្ងន់ធ្ងរ ចំណែកជនដៃដល់ទី៣ បានរត់គេចខ្លួន ដោយការតាមប្រមាញ់កំពុងបន្ត ។
លោក Vaughlin បានបន្ថែមថា អ្នកស៊ើបអង្កេតជឿថាឧបទ្ទវហេតុនេះទំនងជា “ការដោះស្រាយកំហឹង រវាងក្រុមឧក្រិដ្ឋជន ដែលជាគូប្រជែងនឹងគ្នា៕ ប្រែសម្រួលៈ ណៃ តុលា
