បាងកក៖ នាយករដ្ឋមន្ត្រីថៃលោក ប្រាយុទ្ធ ចាន់អូចា បានរារាំងការប៉ុនប៉ងរបស់បក្សប្រឆាំង ដើម្បីដកតំណែងរដ្ឋាភិបាលរបស់លោក បន្ទាប់ពីបានរួចផុតពីការបោះឆ្នោតដកសេចក្ដីទុកចិត្តនៅក្នុងសភានៅថ្ងៃសៅរ៍នេះ។
យោងតាមការផ្សាយបន្តផ្ទាល់ នៃសម័យប្រជុំសភា បានឲ្យដឹងថា លោក ប្រាយុទ្ធ បានឈ្នះការបោះឆ្នោតនៅក្នុងសភា បន្ទាប់ពីទទួលបានសំឡេងគាំទ្រ ២៥៦ សំឡេងនិង ២០៦សំឡេង ប្រឆាំង ជាមួយនឹងការធ្វើអនុបវាទចំនួន ៩សំឡេងពីសមាជិកសភា។
ការបោះឆ្នោតនេះបានធ្វើឡើង បន្ទាប់ពីការជជែកដេញដោលគ្នារយៈពេល ៤ថ្ងៃដែលបានចាក់ផ្សាយផ្ទាល់ក្នុងសប្តាហ៍នេះ ហើយជាការប៉ុនប៉ងចុងក្រោយរបស់ក្រុមប្រឆាំង ដើម្បីដកតំណែងរដ្ឋាភិបាលរបស់លោក។
គួរបញ្ជាក់ថា រដ្ឋមន្ត្រីគណៈរដ្ឋមន្ត្រីចំនួន ១០ រូប ដែលត្រូវបានក្រុមប្រឆាំងនាយករដ្ឋមន្ត្រីដាក់គោលដៅរួមជាមួយនឹងចលនាមិនទុកចិត្តនោះ ក៏បានរួចផុតពីការបោះឆ្នោតផងដែរ៕
ប្រែសម្រួល ឈូក បូរ៉ា
