បរទេស៖ កាសែត Basler Zeitung បានរាយការណ៍នៅសប្តាហ៍នេះថា ប្រទេសស្វីសបានបង្កើតផែនការ សង្គ្រោះបន្ទាន់មួយក្នុងករណីមានវិបត្តិថាមពល ប្រសិនបើការផ្គត់ផ្គង់ឧស្ម័នធម្មជាតិ និងអគ្គិសនី អាចដំណើរការបានក្នុងរយៈពេលខ្លី។
យោងតាមសារព័ត៌មាន RT ចេញផ្សាយនៅថ្ងៃទី២៣ ខែកក្កដា ឆ្នាំ២០២២ បានឲ្យដឹងថា យោងតាមកាសែតនេះ រដ្ឋាភិបាលស្វីសបានធ្វើការរួមគ្នាជាមួយក្រុមហ៊ុនឧស្សាហកម្មជាច្រើនខែលើផែនការនេះ។
វារួមបញ្ចូលជំហានជាច្រើន រាប់ចាប់ពីយុទ្ធនាការផ្សព្វផ្សាយ ការយល់ដឹងជាសាធារណៈ ជាមួយនឹងការអំពាវនាវ ឱ្យមានការសន្សំថាមពល ដូចជាការបិទភ្លើងបង្អួចហាង និងឧបករណ៍កម្តៅ រហូតដល់ការបែងចែកអគ្គិសនីសម្រាប់អ្នកប្រើប្រាស់ថាមពលធំ ប្រហែល ៣០ ០០០ នាក់។
រដ្ឋាភិបាលស្វីសក៏បានព្រមានផងដែរអំពីលទ្ធភាព នៃការបិទថាមពលនៅក្នុងតំបន់មួយចំនួន នៃប្រទេសពី ៤ ទៅ ៨ ម៉ោងក្នុងមួយថ្ងៃដែលជាវិធានការតឹងរ៉ឹងជាងនេះ។ ប្រធានសមាគមក្រុមហ៊ុនអគ្គិសនីស្វ៊ីស (VSE) លោក Michael Frank បានប្រាប់អ្នកយកព័ត៌មានថា ផែនការនេះនឹងត្រូវបានដាក់ឱ្យដំណើរការ ក្នុងករណីមានការខ្វះខាតអគ្គិសនី៕ ប្រែសម្រួល៖ ណៃ តុលា
