ប៉េកាំង ៖ អ្នកនាំពាក្យចិនដីគោក កាលពីថ្ងៃពុធបានសម្តែង ការកោតសរសើរ ដោយស្មោះ ចំពោះការតវ៉ា ដែលធ្វើឡើង ដោយគណបក្ស នយោបាយជាច្រើនក្រុម និងបុគ្គលនៅក្នុងតំបន់តៃវ៉ាន់ របស់ប្រទេសចិន ប្រឆាំងនឹងដំណើរទស្សនកិច្ច របស់ប្រធានសភា អាមេរិកលោកស្រី Nancy Pelosi ទៅកាន់កោះនេះ ។
លោក Ma Xiaoguang អ្នកនាំពាក្យការិយាល័យ កិច្ចការតៃវ៉ាន់ នៃក្រុមប្រឹក្សារដ្ឋ បានធ្វើការកត់សម្គាល់ទាំងនេះ ជាការឆ្លើយតបទៅនឹងបាតុកម្ម នាពេលថ្មីៗនេះដោយផ្នែកផ្សេងៗ នៃសង្គម ដែលប្រឆាំងនឹង “ឯករាជ្យភាពតៃវ៉ាន់” និងការលើកកម្ពស់ការ បង្រួបបង្រួមជាតិនៅតៃវ៉ាន់ ដើម្បីប្រឆាំងនឹងដំណើរទស្សនកិច្ច របស់លោកស្រី Pelosi ។
ដោយពណ៌នាការតវ៉ាទាំងនេះថា ជាសកម្មភាពសុចរិត លោក Ma បានលើកឡើងថា ពួកគេត្រូវបានជំរុញដោយអារម្មណ៍ល្អ សម្រាប់ប្រជាជាតិចិន នេះបើយោងតាមការចុះផ្សាយ របស់ទីភ្នាក់ងារសារព័ត៌មានចិនស៊ិនហួ។
លោក Ma បានបន្ថែមថា សកម្មភាពបែបនេះឆ្លុះបញ្ចាំង ពីមតិសាធារណៈដែលរីករាលដាល នៅក្នុងកោះតៃវ៉ាន់ ដើម្បីបដិសេធការបង្ខិតបង្ខំ ដោយកងកម្លាំងខាងក្រៅ និង បដិសេធមិនព្រមធ្វើជាចំណាប់ខ្មាំង ដោយអាជ្ញាធរគណបក្សវឌ្ឍនភាព ប្រជាធិបតេយ្យ (DPP) ដែលបង្ហាញពីការអំពាវនាវ របស់ប្រជាជនសម្រាប់សន្តិភាព ការអភិវឌ្ឍន៍ និងសុខុមាលភាព ។
អ្នកនាំពាក្យរូបនេះ បានបន្ដថា ការតវ៉ាទាំងនេះបានលាតត្រដាង ផែនការទុច្ចរិតរបស់លោកស្រី Pelosi ក្នុងការបង្កើនភាពតានតឹង នៅទូទាំងច្រក សមុទ្រតៃវ៉ាន់ និងនាំមកនូវគ្រោះមហន្តរាយ ដល់ប្រជាជនតៃវ៉ាន់ ហើយបានថ្កោលទោសលោកស្រី Tsai Ing-wen និងអាជ្ញាធរ DPP ចំពោះការឃុបឃិតជាមួយកងកម្លាំងបរទេស និងការបង្កហេតុ ក្នុងការស្វែង រកឯករាជ្យភាពតៃវ៉ាន់”៕
