ប៉េកាំង ៖ អ្នកប្រាជ្ញ និងមន្ត្រី នៅក្រៅប្រទេស បានស្តីបន្ទោសយ៉ាងខ្លាំង ចំពោះដំណើរទស្សនកិច្ច របស់ប្រធានសភា តំណាងរាស្រ្តអាមេរិក លោកស្រី Nancy Pelosi ទៅកាន់កោះតៃវ៉ាន់ កាលពីថ្ងៃអង្គារ ដោយថា ទង្វើនេះបានធ្វើឱ្យខូចដល់អធិបតេយ្យភាព និងបូរណភាពទឹកដី របស់ចិនយ៉ាងធ្ងន់ធ្ងរ គំរាមកំហែងយ៉ាងធ្ងន់ធ្ងរ ដល់សន្តិភាព និងស្ថិរភាពនៅទូទាំងច្រកសមុទ្រតៃវ៉ាន់ និងបំពានយ៉ាងធ្ងន់ធ្ងរ លើច្បាប់អន្តរជាតិ និងបទដ្ឋានជាមូលដ្ឋាន នៃទំនាក់ទំនង អន្តរជាតិ។
ក្រុមអ្នកប្រាជ្ញបានឲ្យដឹងថា ទង្វើនេះគឺមិនពេញនិយមជាមួយសហគមន៍អន្តរជាតិ ហើយគ្មានប្រយោជន៍អ្វីឡើយ។ អធិបតេយ្យភាព និងបូរណភាពទឹកដីរបស់ចិន មិនអនុញ្ញាតឱ្យមានការបំពានឡើយ។
សារព័ត៌មាន Tass រាយការណ៍ថា អ្នកនាំពាក្យវិមានក្រឹមឡាំង លោក Dmitry Peskov បានលើកឡើងថា រុស្ស៊ីមានសាមគ្គីភាពជាមួយចិន លើសំណួរតៃវ៉ាន់។
លោកបានលើកឡើងថា “យើងគោរពអធិបតេយ្យភាព និងបូរណភាពទឹកដី របស់ប្រទេសចិន ហើយគិតថា គ្មានប្រទេសណាមួយក្នុងពិភពលោក គួរតែមានសិទ្ធិសាកសួរ ឬអនុវត្តជំហានណាមួយនៃការញុះញង់ ឬធម្មជាតិផ្សេងទៀតនោះទេ”។
លោក Ghassan Youssef អ្នកជំនាញខាងនយោបាយ និង ជាអ្នកវិភាគជនជាតិស៊ីរី បានលើកឡើងថា សហរដ្ឋអាមេរិក ខ្វះការគោរព ចំពោះអធិបតេយ្យភាព និងបូរណភាពទឹកដីនៃប្រទេសដទៃ ហើយធ្វើសកម្មភាពដោយចេតនា ដើម្បីផលប្រយោជន៍ភូមិសាស្ត្រ នយោបាយរបស់ខ្លួន។
លោកបានបន្ដថា ប្រទេសចិន នឹងចាត់វិធានការតបតយ៉ាងខ្លាំងក្លា ដើម្បីការពារអធិបតេយ្យភាព និងបូរណភាព ទឹកដីរបស់ខ្លួន នេះបើយោងតាមការចុះផ្សាយ របស់ទីភ្នាក់ងារសារព័ត៌មានចិនស៊ិនហួ ។
លោក Hassan Aslam Shad អ្នកឯកទេសផ្នែកច្បាប់អន្តរជាតិ ប៉ាគីស្ថានបានលើកឡើងថា សហរដ្ឋអាមេរិក កំពុងព្យាយាមធ្វើឱ្យកោះតៃវ៉ាន់ ក្លាយជាក្បាលស្ពានប្រឆាំង នឹងប្រទេសចិន ហើយបានសាកល្បង ខ្សែបន្ទាត់ក្រហមរបស់ចិន ម្តងហើយ ម្តងទៀត និងបានជំទាស់នឹងផល ប្រយោជន៍ស្នូលរបស់ចិន ជាមួយនឹងគោលបំណងសំខាន់ ដើម្បីទប់ស្កាត់ការ អភិវឌ្ឍន៍ដោយសន្តិភាពរបស់ចិន ៕
ប្រែសម្រួល ឈូក បូរ៉ា
