អឺរ៉ុប ដាក់ចេញ នូវអត្ថបទចុងក្រោយ សម្រាប់ការស្តារឡើងវិញ នូវកិច្ចព្រមព្រៀងនុយក្លេអ៊ែរអ៊ីរ៉ង់

ព្រុចសែល ៖ សហភាពអឺរ៉ុប បានដាក់ចេញនូវអត្ថបទ ចុងក្រោយ នៃសេចក្តីសម្រេច សេចក្តីព្រាងស្តីពីការស្តារឡើងវិញ នូវកិច្ចព្រមព្រៀងនុយក្លេអ៊ែរ អ៊ីរ៉ង់ ឆ្នាំ២០១៥ ខណៈដែលកំពុងរង់ចាំការ សម្រេចចិត្តផ្នែកនយោបាយ ពីអ្នកចូលរួមកិច្ចចរចា នៅទីក្រុងវីយែន។

ប្រធានគោលនយោបាយ ការបរទេស របស់សហភាពអឺរ៉ុប លោក Josep Borrell បានសរសេរនៅលើសារ កាលពីថ្ងៃចន្ទថា “អ្វីដែលអាចចរចាបានត្រូវបានចរចា ហើយឥឡូវនេះ វាស្ថិតនៅក្នុងអត្ថបទចុងក្រោយ” ។

លោកបានបន្ថែមថា “ទោះជាយ៉ាងណាក៏ដោយ នៅពីក្រោយបញ្ហាបច្ចេកទេស និងគ្រប់កថាខណ្ឌ គឺជាការសម្រេច ចិត្តនយោបាយ ដែលត្រូវធ្វើឡើងនៅក្នុងរាជធានី ។ ប្រសិនបើចម្លើយទាំងនេះមានភាពវិជ្ជមាន នោះយើងអាចចុះហត្ថលេខាលើ កិច្ចព្រមព្រៀងនេះ” ។

លោក Mikhail Ulyanov តំណាងអចិន្ត្រៃយ៍របស់រុស្ស៊ី ប្រចាំអង្គការអន្តរជាតិនៅទីក្រុងវីយែន និងជាប្រធានអ្នកចរចា នៃកិច្ចចរចានុយក្លេអ៊ែរអ៊ីរ៉ង់ បាននិយាយនៅលើសាររបស់លោកថា “អ្នកចូលរួមក្នុងកិច្ចចរចានៅទីក្រុងវីយែន ពេលនេះត្រូវសម្រេចចិត្តថា តើសេចក្តីព្រាងច្បាប់នេះអាចទទួលយក បានសម្រាប់ពួកគេដែរឬទេ ក្នុងករណីគ្មាន ការជំទាស់ទេ កិច្ចព្រមព្រៀង នុយក្លេអ៊ែរ នឹង ត្រូវ បាន ស្ដារ ឡើង វិញ”។

លោក Wang Qun តំណាងអចិន្ត្រៃយ៍ របស់ប្រទេសចិន ប្រចាំនៅអង្គការសហប្រជាជាតិនៅទីក្រុងវីយែន និងជាប្រធានអ្នកចរចា កាលពីថ្ងៃចន្ទបានជំរុញឱ្យសហរដ្ឋអាមេរិក ធ្វើការ សម្រេចចិត្ត នយោបាយភ្លាមៗ ដើម្បីជួយលើកកម្ពស់ កិច្ចព្រមព្រៀងដំបូងនៅក្នុង កិច្ចចរចានុយក្លេអ៊ែរអ៊ីរ៉ង់។

កិច្ចពិភាក្សានៅទីក្រុងវីយែន ស្តីពីការស្តារឡើងវិញ នូវកិច្ចព្រមព្រៀងនុយក្លេអ៊ែរអ៊ីរ៉ង់ ដែលត្រូវបានគេស្គាល់ជាផ្លូវការថា ផែនការសកម្មភាពទូលំទូលាយរួម (JCPOA) បានបន្តនៅក្នុងរដ្ឋធានីអូទ្រីស កាលពីសប្តាហ៍មុន បន្ទាប់ពីបានផ្អាកអស់រយៈពេល ៥ខែ៕

ប្រែសម្រួល ឈូក បូរ៉ា