ប្រទេសចិន មានអង្គភាពថាមពល នុយក្លេអ៊ែរច្រើនជាងគេទី២ លើពិភពលោក

ប៉េកាំង៖ លោក Tang Bo មន្ត្រីរដ្ឋបាលសុវត្ថិភាព នុយក្លេអ៊ែរជាតិបានឲ្យដឹងថា ប្រទេសចិន មានចំនួនអង្គភាព ថាមពលនុយក្លេអ៊ែរធំជាងគេទីពីរ ដែលកំពុងដំណើរការ ឬកំពុងសាងសង់នៅក្នុងពិភពលោក នេះបើយោងតាមការចុះផ្សាយ របស់ទីភ្នាក់ងារសារព័ត៌មានចិនស៊ិនហួ។

ថ្លែងក្នុងពិធីបើកសន្និសីទ អន្តរជាតិស្តីពីវិស្វកម្មនុយក្លេអ៊ែរ (ICONE) លើកទី២៩ លោក Tang បានលើកឡើងថា គិតត្រឹមខែមិថុនាឆ្នាំនេះ ប្រទេសចិនមានអង្គភាព ថាមពលនុយក្លេអ៊ែរចំនួន ៥៤ កំពុងដំណើរការ ហើយ ២៣ កំពុងសាងសង់។

លោក Tang បានបន្ដថា ការអភិវឌ្ឍន៍ថាមពលនុយក្លេអ៊ែរ បានជួយប្រទេសចិន ធានាបាននូវការផ្គត់ផ្គង់ ថាមពលគ្រប់គ្រាន់ កែលម្អបរិស្ថាន និងខិតទៅជិតគោលដៅនៃ ការឈានទៅដល់កំពូលកាបូន និងអព្យាក្រឹតភាពកាបូន។

លោក Wang Shoujun ប្រធានសមាគមនុយក្លេអ៊ែរចិន បានលើកឡើងថា សមត្ថភាពដំឡើងប្រតិបត្តិការ សរុបនៃថាមពលនុយក្លេអ៊ែរ របស់ប្រទេសនេះត្រូវបានគេរំពឹងថា នឹងឈានដល់ប្រហែល ៧០ លានគីឡូវ៉ាត់ត្រឹមឆ្នាំ២០២៥ ។

ប្រទេសចិន បានប្រកាសថា ខ្លួននឹងខិតខំដើម្បីឈានទៅដល់ ការបំភាយកាបូនឌីអុកស៊ីតខ្ពស់បំផុត នៅឆ្នាំ២០៣០ និងសម្រេចបាននូវអព្យាក្រឹតភាព កាបូននៅឆ្នាំ២០៦០។

ផ្តួចផ្តើមគំនិតរួមគ្នាដោយសមាគម វិស្វករមេកានិកជប៉ុន និងសមាគមវិស្វករមេកានិកអាមេរិក ក្នុងឆ្នាំ១៩៩១ ICONE គឺជាសន្និសីទសកលកំពូល សម្រាប់អ្នកជំនាញនុយក្លេអ៊ែរ។ សមាគមនុយក្លេអែរចិន គឺជាអ្នករៀបចំមួយ ចាប់តាំងពីឆ្នាំ២០០៥ ៕

ប្រែសម្រួល ឈូក បូរ៉ា