នាពេលថ្មីៗកន្លងទៅនេះ យោងតាមទិន្នន័យនាំចេញអំពីទំហំពាណិជ្ជកម្មជាមួយបរទេស របស់ប្រទេសចិនប្រចាំខែកក្កដាឆ្នាំនេះដែលចេញផ្សាយ ដោយអគ្គនាយកដ្ឋានគយចិនបានបង្ហាញឱ្យឃើញថា បរិមាណសរុបនៃទំហំពាណិជ្ជកម្មជាមួយបរទេសរបស់ប្រទេសចិន បានឡើងដល់ ៣ សែន ៣ ម៉ឺន ២ ពាន់ ៩ រយ ៦០ លានដុល្លារអាមេរិក ដែលបានកើនឡើង ១៨ ភាគរយ ! ទិន្នន័យទាំងនេះបានហួសពីការប៉ាន់ប្រមាណរបស់មជ្ឈដ្ឋានខាងក្រៅម្តងទៀត ។ ក្រោមការជំរុញនៃការនាំចេញយ៉ាងខ្លាំង អតិរេកខាងពាណិជ្ជកម្មរបស់ប្រទេសចិននៅខែនេះ គឺ ១ សែន ១ ពាន់ ២៦ រយលានដុល្លារអាមេរិក បានកើនឡើង ៨១,៥ ភាគរយ ដែលបានបំបែកកំណត់ត្រាប្រវត្តិសាស្ត្រថ្មី ក្នុងរយៈពេលដូចគ្នា ។
គួររំលឹកថា មុនពេលទិន្នន័យស្ថិតិរបស់ រដ្ឋាភិបាលចិនបានចេញផ្សាយ ទីភ្នាក់ងារសារព័ត៌មាន Reuters ធ្លាប់ព្យាករណ៍ថា ការនាំចេញក្នុងខែកក្កដាឆ្នាំនេះ ប្រហែលនឹងកើនឡើង ១៥ ភាគរយ ចំណែកឯការប៉ាន់ប្រមាណរបស់ សេដ្ឋវិទូក្នុងពេលផ្តល់បទសម្ភាសន៍ជាមួយ ទីភ្នាក់ងារសារព័ត៌មាន Bloomberg គឺ ១៤,១ ភាគរយ ។ ប៉ុន្តែលទ្ធផលបានបញ្ជាក់ថា កំណើននៃការនាំចេញរបស់ប្រទេសចិន ក្នុងខែកក្កដាឆ្នាំនេះបានបន្តបង្កើនល្បឿនតទៅទៀត ។ ទាក់ទិននឹងរឿងនេះ ប៉ុស្តិ៍ព័ត៌មាននិងពាណិជ្ជកម្មរបស់អ្នកប្រើប្រាស់អាមេរិក CNBC បានវាយតម្លៃថា ការនាំចេញរបស់ប្រទេសចិន ក្នុងខែកក្កដាឆ្នាំនេះ”បានបង្កើនល្បឿនលើសពីការប៉ាន់ប្រមាណ”ដែលនឹងនាំមកនូវការកើនឡើងជាលក្ខណៈ លើកទឹកចិត្តដល់សេដ្ឋកិច្ចចិន ។
និយាយជារួម ទំហំពាណិជ្ជកម្មសរុបខាងការនាំចេញ និងនាំចូលនៃប្រទេសចិនក្នុងរយៈពេល ៧ ខែដំបូងឆ្នាំនេះបានកើនឡើង ១០,៤ ភាគរយបើប្រៀបធៀប នឹងរយៈពេលដូចគ្នានៃឆ្នាំ ២០២១ ។ ក្នុងបរិបទដែលការងើបឡើងវិញ នៃសេដ្ឋកិច្ចសកលមានភាពលំបាកយ៉ាងខ្លាំង ហើយពាណិជ្ជកម្មនិងការបណ្តាក់ទុនមានភាពទន់ខ្សោយ ប្រទេសចិនទទួលបានសមិទ្ធផលបែបនេះ គឺមិនងាយទេ ។ ប្រការនេះក៏បានបញ្ជាក់ម្តងទៀតថា តួនាទីដ៏សំខាន់របស់ប្រទេសចិន ក្នុងខ្សែសង្វាក់ឧស្សាហកម្មនិងខ្សែសង្វាក់ផ្គត់ផ្គង់ជាសកល គឺមិនអាចជំនួសបានទេ ។
គួរបញ្ជាក់ថា ក្នុងរយៈពេល ៧ ខែដំបូងឆ្នាំនេះ ទំហំពាណិជ្ជកម្មសរុបខាងការនាំចេញនាំចូល របស់ប្រទេសចិនជាមួយដៃគូពាណិជ្ជកម្មសំខាន់ៗ ដូចជា សមាគមអាស៊ាន សហភាពអឺរ៉ុប អាមេរិកនិងកូរ៉េខាងត្បូង ជាដើមបានកើនឡើងយ៉ាងខ្លាំង បើគិតតាមប្រាក់យាន់ចិន បានកើនឡើង ១៣,២ ភាគរយ ៨,៩ ភាគរយ ១១,៨ ភាគរយនិង ៨,៩ ភាគរយដោយឡែកពីគ្នាបើប្រៀបធៀប នឹងរយៈពេលដូចគ្នានៃឆ្នាំ ២០២១ ។ ក្នុងពេលដំណាលគ្នា ក្នុងចំណោមផលិតផលនាំចេញរបស់ប្រទេសចិន ផលិតផលគ្រឿងចក្រ និងអេឡិចត្រូនិកបានឡើងដល់ ៧,៥៧ ទ្រីលានប្រាក់យាន់ចិន ដែលបានកើនឡើង ១០,១ ភាគរយស្មើនឹង ៥៦,៦ ភាគរយនៃទំហំនាំចេញសរុបរបស់ចិន ។ រាល់ទិន្នន័យសុទ្ធតែបានបង្ហាញឱ្យឃើញថា ការអភិវឌ្ឍរបស់ប្រទេសចិនមិន អាចឃ្លាតពីពិភពលោកនោះទេ ហើយភាពរុងរឿងថ្កុំថ្កើង របស់ពិភពលោកក៏មិនអាចឃ្លាពីប្រទេសចិននោះដែរ ។
គួររំលឹកផងដែរថា មូលហេតុដែល”តារាងពិន្ទុ”នៃទំហំពាណិជ្ជកម្មជាមួយបរទេស របស់ប្រទេសចិនបានហួសពីការប៉ាន់ប្រមាណម្តងហើយម្តងទៀត គឺអាស្រ័យដោយការងើបឡើងវិញយ៉ាងឆាប់រហ័ស នៃខ្សែសង្វាក់ឧស្សាហកម្មនិងខ្សែសង្វាក់ផ្គត់ផ្គង់ ។
សូមយកទីក្រុងសៀងហៃធ្វើជាឧទាហរណ៍ ។ ទន្ទឹមនឹងជំងឺកូវីដ ១៩ ត្រូវបានគ្រប់គ្រងប្រកបដោយប្រសិទ្ធភាព ចាប់ពីចុងខែឧសភា ឆ្នាំនេះមក ពាណិជ្ជកម្មនាំចេញនាំចូល ជាមួយបរទេសបានរៀបចំភាពប្រក្រតីឡើងវិញជាបន្តបន្ទាប់ ពេលដល់ខែមិថុនា ការនាំចូលនិងនាំចេញរបស់ទីក្រុងសៀងហៃ បានរៀបចំការកើនឡើងជាវិជ្ជមាន រហូតដល់ខែកក្កដា បរិមាណលើកដាក់កុងតឺន័ររបស់ទីក្រុងសៀងហៃ បានលើសពី ៤,៣ លាន TEUs ដែលបានបំបែកកំណត់ត្រាប្រវត្តិសាស្ត្រថ្មីក្នុងរយៈពេលដូចគ្នា ។
សមិទ្ធផលដែលពាណិជ្ជកម្មជាមួយ បរទេសរបស់ចិនទទួលបានក៏មិនអាចឃ្លាតពីការពង្រីក តម្រូវការក្នុងស្រុកជាបន្តបន្ទាប់ផងដែរ ។ ក្នុងរយៈពេល ៧ ខែដំបូងឆ្នាំនេះ ទំហំពាណិជ្ជកម្មសរុបខាងការនាំចូលរបស់ ប្រទេសចិនបានឡើងដល់ ១,៥៨ ទ្រីលានដុល្លារអាមេរិក ដែលបានកើនឡើង ៥,៣ ភាគរយ ។
ទំហំពាណិជ្ជកម្មជាមួយបរទេសរបស់ចិនបានហួសពីការប៉ាន់ប្រមាណម្តងទៀតដែលជាសញ្ញានៃនិន្នាការប្រកបដោយស្ថិរភាពនិងល្អប្រសើរនៃសេដ្ឋកិច្ចចិន ។ ដូចប្រសាសន៍របស់លោក Sergey Lukonin បញ្ញវន្តនៃវិទ្យាស្ថានសិក្សាស្រាវជ្រាវសេដ្ឋកិច្ចពិភពលោកនិងទំនាក់ទំនងអន្តរជាតិនៃបណ្ឌិតសភាវិទ្យាសាស្ត្ររុស្ស៊ីដែលបានលើកឡើងថា ការពង្រីកការបើកទូលាយជាបន្តបន្ទាប់របស់ចិនវាមិនត្រឹមតែមានអំណោយផលដល់ប្រទេសចិនខ្លួនប៉ុណ្ណោះទេ ថែមទាំងក៏មានអំណោយផលដល់ពិភពលោកផងដែរ ក្នុងន័យនាំមកនូវឱកាសកាន់តែច្រើនដែលផ្តល់ផលប្រយោជន៍ដល់គ្នាទៅវិញទៅមកនិងឈ្នះ-ឈ្នះដល់សហគ្រាសនិងផលិតផលបរទេស ៕
អត្ថបទ៖ វិទ្យុមិត្តភាពកម្ពុជាចិន
