រ៉ងហ្គូន៖ ទូរទស្សន៍សិង្ហបុរី Channel News Asia បានផ្សព្វផ្សាយនៅថ្ងៃទី១៦ ខែសីហា ឆ្នាំ២០២២ថា តុលាការនៅក្នុងប្រទេសមីយ៉ាន់ម៉ា ដែលគ្រប់គ្រងដោយយោធា បានកាត់ទោសមេដឹកនាំ ដែលត្រូវបានបណ្តេញចេញពីតំណែង គឺលោកស្រី អ៊ុងសាន ស៊ូជី (Aung San Suu Kyi) ឱ្យជាប់ពន្ធនាគាររយៈពេល៦ឆ្នាំ កាលពីថ្ងៃចន្ទ បន្ទាប់ពីបានរកឃើញថា លោកស្រីមានកំហុស ក្នុងសំណុំរឿងពុករលួយចំនួន៤ ។ ប្រភពដែលដឹងអំពីដំណើរការ នីតិវិធីបានឲ្យដូច្នេះ ។
ម្ចាស់ជ័យលាភីណូបែលវ័យ៧៧ឆ្នាំ និងជាប្រធានបក្សប្រឆាំងរបស់មីយ៉ាន់ម៉ា ចំពោះការគ្រប់គ្រងដោយយោធា ត្រូវបានចោទប្រកាន់ពីបទប្រព្រឹត្តិយ៉ាងតិច ចំនួន១៨ រាប់ចាប់ពីអំពើពុករលួយ រហូតដល់ការរំលោភលើការបោះឆ្នោត ដោយអាចជាប់ពន្ធនាគារ អតិបរមាជិត១៩០ឆ្នាំ ។
លោកស្រី អ៊ុងសាន ស៊ូជី បានហៅការចោទប្រកាន់នេះថា មិនសមហេតុផល ហើយបដិសេធរាល់ការចោទប្រកាន់ មកលើលោកស្រី ។
ប្រភពបានឲ្យដឹងថា លោកស្រីត្រូវបានគេរកឃើញថា មានពិរុទ្ធភាពកាលពីថ្ងៃចន្ទ ពីបទប្រើប្រាស់មូលនិធិមិនត្រឹមត្រូវ ពីមូលនិធិ Daw Khin Kyi ដែលជាអង្គការដែលលោកស្រី បានបង្កើតការលើកកម្ពស់សុខភាព និងការអប់រំ ដើម្បីសាងសង់ផ្ទះ និងជួលដីដែលគ្រប់គ្រង ដោយរដ្ឋាភិបាល ក្នុងអត្រាបញ្ចុះតម្លៃ ។
លោកស្រី អ៊ុងសាន ស៊ូជី ដែលកំពុងត្រូវបានឃុំខ្លួនតែម្នាក់ឯង នៅក្នុងពន្ធនាគារក្នុងរដ្ឋធានី ណៃពិដោរ ត្រូវបានកាត់ទោសឱ្យជាប់ពន្ធនាគារ រយៈពេល១១ឆ្នាំរួចហើយ នៅក្នុងករណីផ្សេងទៀត ៕ ប្រែសម្រួលដោយ៖ ម៉ៅ បុប្ផាមករា
Warning: Attempt to read property "term_id" on false in /var/www/dap-news.com/htdocs/wp-content/themes/flex-mag/functions.php on line 999
