បរទេស៖ យោងតាមការចេញផ្សាយរបស់ Al Jazeera កាលពីថ្ងៃសុក្រម្សិលមិញនេះ បានឲ្យដឹងថា សំណើរមួយរបស់ប្លុកអឺរ៉ុប ដែលបានបញ្ជូនទៅឲ្យទីក្រុង Vienna ដើម្បីធ្វើឲ្យរស់ឡើងវិញ នៃកិច្ចព្រមព្រៀងនុយក្លេអ៊ែរអ៊ីរ៉ង់ ត្រូវបានបញ្ចូលទាំងលក្ខខណ្ឌ ក្នុងការដកយកទណ្ឌកម្មទាំងអស់ ភ្លាមពីក្រុមហ៊ុនចំនួន ១៦០របស់អ៊ីរ៉ង់ រួមទាំងធនាគារផងដែរ។
សំណើរដែលត្រូវបានអឹរ៉ុបហៅថា ជាសំណើរចុងក្រោយឬ Final ដែលក្នុងនោះមានរួមទាំងដំណាក់កាល សម្រាប់ដំណើរការចំនួន និងមានរយៈពេល ១២០ថ្ងៃ ក្នុងការអនុវត្តឲ្យបានពេញលេញ។
ប្រភពដដែលបានបញ្ជាក់ទៀតថា នៅក្រោយកិច្ចព្រមព្រៀងនេះ ត្រូវបានចុះហត្ថលេខាភ្លាម ធនាគារអ៊ីរ៉ង់ចំនួន១៧ និងក្រុមហ៊ុនអាជីវកម្មអ៊ីរ៉ង់ចំនួន១៥០ នឹងត្រូវលប់ចោលចេញពីបញ្ជី ដាក់ទណ្ឌកម្មភ្លាមដើម្បីធានាឲ្យអ៊ីរ៉ង់ អាចផ្តល់ការប្តេជ្ញាចិត្តច្បាស់ ជាមួយនឹងកិច្ចព្រមព្រៀង។
ក្រៅពីនោះគេអាចជឿជាក់ទៀតថា ការអនុវត្តកិច្ចព្រមព្រៀង នឹងមានទាំងការបញ្ចប់ការបង្កកទ្រព្យសម្បត្តិ របស់អ៊ីរ៉ង់ដែលមានទំហំ ៧ពាន់លានដុល្លារ ចេញពីធនាគាររបស់កូរ៉េខាងត្បូងផងដែរ៕
ប្រែសម្រួល៖ ស៊ុន លី
