តេអេរ៉ង់៖ អ្នកនាំពាក្យក្រសួងការបរទេសអ៊ីរ៉ង់ បានឲ្យដឹងថា បរិយាកាសក្នុងតំបន់ជាវិជ្ជមាន អំពាវនាវឱ្យទីក្រុងតេអេរ៉ង់ និងទីក្រុងរីយ៉ាដ បោះជំហានទៅមុខឆ្ពោះទៅរក ការបន្តទំនាក់ទំនងទ្វេភាគីឡើងវិញ។
នៅក្នុងសន្និសីទសារព័ត៌មានប្រចាំសប្តាហ៍ លោក Nasser Kanaani បានឲ្យដឹងថា បរិយាកាសទាំងមូល នៅក្នុងតំបន់មានភាពវិជ្ជមាន ដោយបន្ថែមថា វាអាចបង្កើតក្តីសង្ឃឹមនៃការកែលម្អឡើងវិញ នៅក្នុងទំនាក់ទំនងរបស់អ៊ីរ៉ង់ ជាមួយរដ្ឋជិតខាង និងក្នុងតំបន់។
យោងតាមលោក Kanaani ឯកអគ្គរដ្ឋទូតគុយវ៉ែតថ្មី បានមកដល់ទីក្រុងតេអេរ៉ង់ ហើយប្រទេសអារ៉ាប់រួមត្រូវបានគេរំពឹងថា នឹងបញ្ជូនឯកអគ្គរដ្ឋទូតរបស់ខ្លួនទៅកាន់ប្រទេសអ៊ីរ៉ង់ក្នុងពេលឆាប់ៗនេះផងដែរ។
អ្នកនាំពាក្យរូបនេះបានបន្ដថា អ៊ីរ៉ង់ និងអារ៉ាប៊ីសាអូឌីត ប្រឈមមុខនឹងបញ្ហាទ្វេភាគី និងក្នុងតំបន់រួមគ្នា ដោយបន្ថែមថាកិច្ចពិភាក្សា ស្តីពីការបន្តទំនាក់ទំនងរវាងប្រទេសទាំងពីរ នឹងការពារផលប្រយោជន៍របស់ពួកគេ។
ដោយទទួលស្គាល់ថា ភាពខ្វែងគំនិតគ្នា និងបញ្ហាស្មុគស្មាញនៅតែមានរវាងភាគីទាំងពីរ លោក Kanaani បានលើកឡើងថា ជំហានដ៏ល្អត្រូវបានចាត់វិធានការ ហើយដំណើរការចរចាមានភាពវិជ្ជមាន។
លោកបានបន្ថែមថា ដំណើរការនៃការបន្តទំនាក់ទំនងឡើងវិញ បានបរាជ័យ ក្នុងការប្រព្រឹត្តទៅយ៉ាងឆាប់រហ័ស ដោយលោកបានបន្ថែមថាប្រទេសទាំងពីរមានឆន្ទៈនយោបាយ ដែលត្រូវការ ហើយភាគីអារ៉ាប៊ីសាអូឌីត បានចាត់វិធានការទៅវិញទៅមក ដល់ទីបញ្ចប់នេះ៕ ប្រែសម្រួល ឈូក បូរ៉ា
