តេអេរ៉ង់៖ រដ្ឋមន្ត្រីក្រសួងហិរញ្ញវត្ថុ និងរតនាគាររបស់ប្រទេសតួកគី បាននិយាយកាលពីថ្ងៃសុក្រថា ការព្រួយបារម្ភអំពីការព្រមាន របស់រតនាគារសហរដ្ឋអាមេរិក អំពីក្រុមហ៊ុនតួកគី ដែលប្រឈមនឹងហានិភ័យនៃទណ្ឌកម្ម ប្រសិនបើពួកគេដោះស្រាយជាមួយរុស្ស៊ី ដែលមានទណ្ឌកម្ម គឺ “គ្មានន័យ” ។
លោក Nureddin Nebati បានសរសេរនៅលើបណ្ដាញ Twitter ថា “វាគ្មានន័យទេ ដែលសំបុត្រដែលបានផ្ញើទៅកាន់ ស្ថាប័នធុរកិច្ចតួកគីបង្កឱ្យមានការព្រួយបារម្ភ នៅក្នុងរង្វង់អាជីវកម្មរបស់យើង” ។
សមាគមឧស្សាហកម្ម និងធុរកិច្ចតួកគី ដែលជាក្រុមធុរកិច្ចធំជាងគេរបស់ប្រទេស បានប្រកាសកាលពីថ្ងៃអង្គារថា ពួកគេបានទទួលសំបុត្រពី អនុរដ្ឋមន្ត្រីរតនាគារសហរដ្ឋអាមេរិក Wally Adeyemo ដោយព្រមានអំពីហានិភ័យ ដែលអាចកើតមាននៃទណ្ឌកម្ម ប្រសិនបើក្រុមហ៊ុនតួកគី ធ្វើអាជីវកម្មជាមួយអង្គភាព និងបុគ្គលរុស្ស៊ីដែលស្ថិត នៅក្រោមការគ្រប់គ្រង និងដឹកនាំទណ្ឌកម្មរបស់សហរដ្ឋអាមេរិក។
លោក Nebati បានកត់សម្គាល់ថា តួកគី បានយកចិត្តទុកដាក់លើការ ខិតខំប្រឹងប្រែងរួមគ្នាជាមួយ សម្ព័ន្ធមិត្តរបស់ខ្លួន និងការពង្រឹងកិច្ចសហប្រតិបត្តិការ ប្រឆាំងនឹងបញ្ហាប្រឈមជាសកល និងក្នុងតំបន់ ដោយសង្កត់ធ្ងន់លើតួអង្គទាំងអស់ នៅក្នុងសេដ្ឋកិច្ចតួកគីមានការប្តេជ្ញាចិត្ត ចំពោះគោលការណ៍នៃសេដ្ឋកិច្ចទីផ្សារសេរី។
លោកបានលើកឡើងថា “យើងប្តេជ្ញាអភិវឌ្ឍទំនាក់ទំនងពាណិជ្ជកម្ម និងសេដ្ឋកិច្ចរបស់យើងជាមួយ ប្រទេសជិតខាងក្នុងវិស័យផ្សេងៗ ជាពិសេសវិស័យទេសចរណ៍ ក្នុងក្របខណ្ឌដែលមិនស្ថិតនៅ ក្រោមការដាក់ទណ្ឌកម្ម។
លោក Nebati ក៏ បាន ស្វាគមន៍ ចំពោះ អាជីវកម្ម របស់ សហរដ្ឋ អាមេរិក ក្នុង ការ វិនិយោគ នៅតួកគី។ រតនាគារសហរដ្ឋអាមេរិក បានឲ្យដឹងថាលោក Adeyemo និងអនុរដ្ឋមន្ត្រីក្រសួងហិរញ្ញវត្ថុតួកគី Yunus Elitas កាលពីសប្តាហ៍មុនបានសន្ទនាតាមទូរស័ព្ទ ក្នុងអំឡុងពេលដែលពួកគេជជែកអំពី “កិច្ចខិតខំប្រឹងប្រែងបន្ត ដើម្បីអនុវត្ត និងអនុវត្តទណ្ឌកម្មពហុភាគីទូលំទូលាយ ដែលដាក់លើប្រទេសរុស្ស៊ី”៕
ប្រែសម្រួល ឈូក បូរ៉ា
