បរទេស ៖ មន្ត្រីទូត របស់រដ្ឋាភិបាលប៉េកាំង កាលពីថ្ងៃពុធម្សិលមិញនេះ បានធ្វើការព្រមានថា សហរដ្ឋអាមេរិក ចាំបាច់ត្រូវតែរៀបចំ និងទទួលស្គាល់អំពីបញ្ជី នៃការខូចខាត ដែលបណ្តាលមកពីដំណើរ ទស្សនកិច្ច របស់លោកប្រធានសភា អាមេរិក លោកស្រី Nancy Pelosi ទៅកាន់កោះតៃវ៉ាន់កាលពីពេលថ្មីៗនេះ មុនពេលដែលអាចត្រឡប់ទៅរកការចរចាគ្នាវិញ។
ក្រសួងការបរទេស បានចេញសេចក្តីថ្លែងការណ៍មួយ កាលពីថ្ងៃពុធដែរថា ភាគីអាមេរិកត្រូវតែទាញ យកទៅវិញទាំងអស់នូវឥទ្ធិពលអាក្រក់ ទាំងឡាយដែលបានបណ្តាល មកពីដំណើរទស្សនកិច្ច របស់លោកស្រីប្រធានសភា ទៅកាន់កោះតៃវ៉ាន់ ។
វាក៏ជាលក្ខខណ្ឌមួយ ដែលមិនអាចលើកលែងបានដែរ សម្រាប់កិច្ចប្រជុំរវាងចិន និងអាមេរិកដែលគ្រោងនឹងធ្វើឡើង ចំពោះបញ្ហាបម្រែបម្រួល អាកាសធាតុនោះផងដែរ ។
សេចក្តីថ្លែងការណ៍នេះ ត្រូវបានគេមើលឃើញថា បានធ្វើឡើងជាការឆ្លើយតបទៅនឹងបទ សំភាសរបស់មន្ត្រីប្រេសិត ពិសេសអាមេរិកលោក John Kerry ចំពោះបញ្ហាបម្រែបម្រួល អាកាសធាតុពិភពលោក ដែលលោកបានសង្កត់ធ្ងន់ថា អាមេរិក និងចិនគួរតែបន្តការ ពិភាក្សាគ្នាឡើងវិញ ឲ្យបានមុនកិច្ចប្រជុំកំពូលស្តីអំពីបម្រែបម្រួល អាកាសធាតុ COP27 ដែលគ្រោងធ្វើឡើងនាខែវិច្ឆិកា៕
ប្រែសម្រួល៖ស៊ុនលី
