តេអេរ៉ង់៖ ឧត្តមសេនីយអ៊ីរ៉ង់កំពូលម្នាក់ បានឲ្យដឹងថា អ៊ីរ៉ង់បានចេញការព្រមាន ជាលាយលក្ខណ៍អក្សរ ដល់រដ្ឋក្នុងតំបន់ទាំងអស់ ដែលធ្វើជាម្ចាស់ផ្ទះ នៃកងកម្លាំងយោធាអាមេរិកថា វត្តមានរបស់អាមេរិក បែបនេះបង្កើនការគំរាមកំហែង ប្រឆាំងនឹងអ៊ីរ៉ង់។
លោក Mohammad Baqeri ប្រធានអគ្គសេនាធិការ នៃកងកម្លាំងប្រដាប់អាវុធអ៊ីរ៉ង់ បានធ្វើការកត់សម្គាល់នៅក្នុងការបង្ហោះ នៅលើទំព័ររបស់លោក នៅលើកម្មវិធីប្រព័ន្ធផ្សព្វផ្សាយសង្គម ដែលអភិវឌ្ឍក្នុងស្រុក Rubika ។
លោកបានលើកឡើងថា ការព្រមានជាលាយលក្ខណ៍អក្សរ ត្រូវបានចេញតាមរយៈ ក្រសួងការបរទេសអ៊ីរ៉ង់ នេះបើយោងតាមការចុះផ្សាយ របស់ទីភ្នាក់ងារសារព័ត៌មានចិនស៊ិនហួ។
លោក Baqeri បានបន្ដថា ប្រទេសអ៊ីរ៉ង់ ក៏បានបញ្ជូនការព្រមាន ដល់រដ្ឋទាំងនេះតាមរយៈការពង្រីកវត្តមានរបស់ខ្លួននៅក្នុងតំបន់ បង្កើនចំនួននៃការល្បាត តាមអាកាស និងដែនសមុទ្រ ក៏ដូចជាកម្រិត នៃការត្រួតត្រាស៊ើបការណ៍ និងការធ្វើសមយុទ្ធយោធា ចម្រុះ។
លោកបានកត់សម្គាល់ថា ក្នុងរយៈពេលប៉ុន្មានខែកន្លងមកនេះ “របបភេរវករអាមេរិក” បានស្វែងរកសំណង សម្រាប់ការដកថយនៃយន្តហោះ នាវាចម្បាំង និងនាវាពិឃាតរបស់ខ្លួនពីឈូងសមុទ្រ និងសមុទ្រអូម៉ង់ ដែលបានបង្កើតនូវភាពខ្វះចន្លោះថាមពល ដែលបង្កការភ័យខ្លាចនៅក្នុងសម្ព័ន្ធមិត្តក្នុងតំបន់របស់ខ្លួន ដោយ តភ្ជាប់តំបន់ដែលស្ថិតនៅក្រោមការកាន់កាប់របស់អ៊ីស្រាអែល ទៅនឹងទីបញ្ជាការកណ្តាលរបស់សហរដ្ឋអាមេរិក។
ឧត្តមសេនីយអ៊ីរ៉ង់រូបនេះ បានបន្ថែមថា អ៊ីរ៉ង់តែងតែផ្តល់ដំបូន្មានដល់រដ្ឋជិតខាង ដើម្បីធានាសន្តិសុខក្នុងតំបន់ តាមរយៈការពង្រីកទំនាក់ទំនងជាបងប្អូន និងកិច្ចសហប្រតិបត្តិការក្នុងចំណោមពួកគេ និងចៀសវាងការពឹងផ្អែកលើបរទេស៕
ប្រែសម្រួល ឈូក បូរ៉ា
