ប៉េកាំង៖ អគ្គីភ័យដ៏ធំមួយបានឆាបឆេះអគារការិយាល័យយ៉ាងខ្ពស់មួយនៅកណ្តាលទីក្រុង Changsha រដ្ឋធានីនៃខេត្ត Hunan ភាគខាងត្បូងប្រទេសចិន នៅថ្ងៃសុក្រ ទី១៦ កញ្ញានេះ។
យោងតាមសារព័ត៌មាន CNA ចេញផ្សាយនៅថ្ងៃទី១៦ ខែកញ្ញា ឆ្នាំ២០២២ បានឱ្យដឹងថា ទូរទស្សន៍រដ្ឋចិន CCTV បានផ្សាយថា អគារទូរគមនាគមន៍ចិន ដែលមានកម្ពស់ជាង ២០០ ម៉ែត្រនេះ “ត្រូវបានភ្លើងឆាបឆេះយ៉ាងសន្ធោសន្ធៅ” ដោយបានបញ្ចេញផ្សែងយ៉ាងក្រាស់ទៅលើមេឃ។
យោងតាមនាយកដ្ឋានពន្លត់អគ្គីភ័យរបស់ខេត្ត Hunan បានឱ្យដឹងថា ភ្លើងបានរលត់ហើយ ហើយគេមិនបានរកឃើញអ្នកស្លាប់ និងរបួសនោះទេ។
នាយកដ្ឋាននេះបានបន្ថែមថា រថយន្តពន្លត់អគ្គីភ័យចំនួន ៣៦ គ្រឿង និងភ្លាក់ងារពន្លត់អគ្គីភ័យចំនួន ២៨០នាក់ត្រូវបានដាក់ពង្រាយទៅកាន់កន្លែងកើតហេតុ។
រូបថតមួយសន្លឹកដែលចេញផ្សាយដោយ CCTV បានបង្ហាញអណ្តាតភ្លើងដែលកំពុងឆាបឆេះពេញអគារក្នុងតំបន់សាងសង់ឡើងនៃទីក្រុង ខណៈដែលផ្សែងខ្មៅបានហុយឡើងលើមេឃ៕ប្រែសម្រួលៈ ណៃ តុលា
