បរទេស៖ រដ្ឋមន្ត្រីការពារជាតិ អង់គ្លេស លោក Ben Wallace បានបង្ហាញឱ្យដឹងថា ចក្រភពអង់គ្លេសនឹងបង្កើន ការចំណាយយោធារបស់ខ្លួន ឱ្យបានច្រើនក្នុងប៉ុន្មានឆ្នាំ ខាងមុខនេះ បើទោះបីជាប្រទេសនេះ កំពុងប្រឈមមុខនឹង វិបត្តិសេដ្ឋកិច្ច ដែលបណ្តាលមកពីវិធានការ Covid-19 និងការដាក់ទណ្ឌកម្ម របស់ទីក្រុងឡុង ដ៍មកលើទីក្រុងមូស្គូក៏ដោយ។
យោងតាមសារព័ត៌មាន RT ចេញផ្សាយនៅថ្ងៃទី២៥ ខែកញ្ញា ឆ្នាំ២០២២ បានឱ្យដឹងថា នៅក្នុងបទសម្ភាសន៍ ជាមួយសារព័ត៌មាន Sunday Telegraph ដែលបានចេញផ្សាយកាលពីថ្ងៃអាទិត្យ លោក Wallace បាននិយាយថា រដ្ឋាភិបាលអង់គ្លេស នឹងចំណាយយ៉ាងហោចណាស់ ៥២ពាន់លានផោន (៥៦,៥ ពាន់លានដុល្លារ) ដើម្បីពង្រឹងវិស័យយោធា ដែលពិតជានឹងកើនឡើង។ ផែនការនេះគឺស្របតាមយុទ្ធនាការរបស់នាយករដ្ឋមន្ត្រីលោកស្រី Liz Truss ដែលបានសន្យាថា នឹងជំរុញការចំណាយលើវិស័យការពារជាតិ។
យោងតាមមន្ត្រីរូបនេះ ថវិកាការពារជាតិប្រចាំឆ្នាំ របស់ចក្រភពអង់គ្លេស នឹងមានចំនួន ១០០ ពាន់លានផោននៅឆ្នាំ ២០៣០។
លោក Wallace រដ្ឋមន្ត្រីក្រសួងការពារជាតិ ដែលកាន់តំណែងបន្ទាប់ពីលោកស្រី Liz Truss បានយកឈ្នះលើលោក Sunak ក្នុងការប្រជែងតំណែង ជានាយករដ្ឋមន្ត្រី កាលពីដើមខែកញ្ញា បានប្រាប់អ្នកសារព័ត៌មានថា ឆន្ទៈរបស់មេដឹកនាំថ្មី ក្នុងការចំណាយបន្ថែមលើវិស័យយោធា គឺជាកត្តាសំខាន់មួយសម្រាប់គាត់ ក្នុងការសម្រេចចិត្តជ្រើសរើស បេក្ខភាពមួយណា ត្រឡប់មកវិញសម្រាប់នាយករដ្ឋមន្ត្រី៕
ប្រែសម្រួលៈ ណៃ តុលា
