សេអ៊ូល៖ ទូរទស្សន៍សិង្ហបុរី Channel News Asia បានផ្សព្វផ្សាយនៅថ្ងៃ៧ ខែតុលា ឆ្នាំ២០២២ថា យោធាកូរ៉េខាងត្បូង បានឲ្យដឹងថា កូរ៉េខាងត្បូង និងសហរដ្ឋអាមេរិក បានចាប់ផ្តើមសមយុទ្ធ ដែនសមុទ្ររួមគ្នា ជាមួយនាវាផ្ទុកយន្តហោះ អាមេរិក នៅថ្ងៃសុក្រនេះ មួយថ្ងៃបន្ទាប់ពីខ្លួន បានធ្វើការវាយលុក យន្តហោះចម្បាំង ដើម្បីប្រតិកម្មទៅនឹងសមយុទ្ធ ទម្លាក់គ្រាប់បែក ជាក់ស្តែងរបស់កូរ៉េខាងជើង ។
អគ្គសេនាធិការចម្រុះ របស់កូរ៉េខាងត្បូង បានឲ្យដឹងថា សមយុទ្ធដែនសមុទ្រនឹងធ្វើឡើង នៅក្នុងដែនទឹកនៃឆ្នេរសមុទ្រ ភាគខាងកើត របស់ប្រទេសកូរ៉េខាងត្បូង នៅថ្ងៃទី៧ដល់ទី៨ខែតុលា។ សមយុទ្ធនេះកើតឡើង បន្ទាប់ពីកូរ៉េខាងជើង បានបាញ់មីស៊ីលផ្លោង ចំនួន២គ្រាប់ ចូលទៅក្នុងសមុទ្រកាលពីថ្ងៃព្រហស្បតិ៍ ហើយក្រោយមកបានហោះហើរ យន្តហោះចម្បាំង នៅជិតព្រំដែនជាមួយកូរ៉េខាងត្បូង ថែមទៀត ។
នាយសេនាធិការចម្រុះ របស់កូរ៉េខាងត្បូង បានលើកឡើងថា “យើងនឹងបន្តពង្រឹងសមត្ថភាពប្រតិបត្តិការ និងការត្រៀមខ្លួនរបស់យើង ដើម្បីឆ្លើយតបទៅនឹងការបង្កហេតុណាមួយរបស់កូរ៉េខាងជើង តាមរយៈសមយុទ្ធរួមគ្នាជាមួយ… USS Ronald Reagan Carrier Strike Group” ។
ក្រុមវាយប្រហារ របស់សហរដ្ឋអាមេរិក បានចូលរួមរួចហើយ នៅក្នុងសមយុទ្ធការពារមីស៊ីល ត្រីភាគី ជាមួយនាវាចម្បាំង ពីប្រទេសជប៉ុន និងកូរ៉េខាងត្បូង ក្នុងសប្តាហ៍នេះ ដែលជំរុញដោយការសាកល្បង កាលពីថ្ងៃអង្គារ ដែលកូរ៉េខាងជើង បានបាញ់បង្ហោះមីស៊ីលផ្លោង ដែលហោះរំលងចូល ផ្នែកមួយ នៃប្រទេសជប៉ុន ។
ក្រសួងការពារជាតិកូរ៉េខាងត្បូងបានឲ្យដឹងថា មន្ត្រីការពារជាតិជាន់ខ្ពស់ មកពីប្រទេសជប៉ុន កូរ៉េខាងត្បូង និងសហរដ្ឋអាមេរិកបានពិភាក្សាអំពីការវិវឌ្ឍន៍ចុងក្រោយ បង្អស់ នៅក្នុងការអំពាវនាវមួយ កាលពីថ្ងៃសុក្រ ដោយថ្កោលទោសការបាញ់បង្ហោះ របស់កូរ៉េខាងជើង និងយល់ព្រមថា សមយុទ្ធដែនសមុទ្រត្រីភាគីនាពេលថ្មីៗនេះ បានធ្វើឱ្យប្រសើរឡើងនូវសមត្ថភាព របស់ពួកគេក្នុងការឆ្លើយតប ទៅនឹង ប្រទេសកូរ៉េខាងជើង ៕
ដោយ៖ ម៉ៅ បុប្ផាមករា
