បរទេស៖ ប្រធានាធិបតីអ៊ុយក្រែន លោក Vladimir Zelensky បានចុះហត្ថលេខាលើក្រឹត្យមួយកាលពីថ្ងៃសុក្រ ដោយទទួលស្គាល់កោះ Kuril ស្ថិតនៅភាគខាងត្បូង ជាទឹកដីរបស់ជប៉ុន។ ការប្រកាសជានិមិត្តរូបនេះ បានកើតឡើងពីរថ្ងៃ បន្ទាប់ពីប្រធានាធិបតីរុស្ស៊ី លោក វ្ល៉ាឌីមៀ ពូទីន បានចុះហត្ថលេខាលើច្បាប់ ទទួលយកអតីតតំបន់ចំនួនបួន នៃអ៊ុយក្រែន ចូលទៅក្នុងសហព័ន្ធរុស្ស៊ី។
យោងតាមសារព័ត៌មាន RT ចេញផ្សាយកាលពីថ្ងៃទី៧ ខែតុលា ឆ្នាំ២០២២ បានឱ្យដឹងថា ក្រឹត្យរបស់លោក Zelensky ទទួលស្គាល់កោះ Iturup, Kunashir, Shikotan និង Habomai ជារបស់ជប៉ុន ខណៈពេលដែលប្រជុំកោះ Kurili ទាំងមូលគឺជាទឹកដីរបស់រុស្ស៊ីចាប់តាំងពីចុងបញ្ចប់ នៃសង្គ្រាមលោកលើកទី ២ ហើយប្រទេសជប៉ុន បានទាមទារភាគខាងត្បូងបំផុត ទាំងបួននេះជារបស់ខ្លួន ដោយសំដៅទៅលើកោះទាំងនោះថាជា “ដែនដីភាគខាងជើង” របស់ខ្លួន។
លោក Zelensky បាននិយាយនៅក្នុងសុន្ទរកថា តាមរយៈវីដេអូមួយថា “ការសម្រេចចិត្តដ៏សំខាន់មួយ ត្រូវបានធ្វើឡើងនៅថ្ងៃនេះ។ យុត្តិធម៌ ភាពស្របច្បាប់គ្មានកំហុស ប្រវត្តិសាស្ត្រ។ អ៊ុយក្រែន បានអះអាងឡើងវិញ នូវការគោរពរបស់ខ្លួន ចំពោះអធិបតេយ្យភាព និងបូរណភាពទឹកដី របស់ប្រទេសជប៉ុន រួមទាំងដែនដីភាគខាងជើងរបស់ខ្លួន ដែលនៅតែស្ថិតនៅក្រោមការកាន់កាប់របស់រុស្ស៊ី។
លោក Zelensky ដែលបានប្តេជ្ញាដណ្ដើមយក ទឹកដីអតីតអ៊ុយក្រែនទាំងអស់ រួមទាំងតំបន់គ្រីមេផងនោះ បានប្រកាសថា “វាចាំបាច់ដើម្បីរំដោះចេញពីការកាន់កាប់ របស់រុស្ស៊ីលើទឹកដីទាំងអស់ ដែលពួកអ្នកកាន់កាប់កំពុងព្យាយាមរក្សា”៕ ប្រែសម្រួលៈ ណៃ តុលា
